Shillong, Jylliew 08
Ka Meghalaya Football Association (MFA) ka la pynpaw ïa ki 13 tylli ki kynhun kiba ïashim bynta ha ka Meghalaya Women’s State League (MWSL), kaba la thmu ban sdang naduh u Nailar mynta u snem.
Kane ka jingangnud ban pynlong ïa katei ka lympung ha ka sien kaba nyngkong eh lyngba ki district bapher bapher jong ka jylla kiba la pynïasoh sha ka MFA. Kane ka dei ka jing-angnud jong katei ka synjuk na ka bynta ban pynlong ïa kane ka lympung ïalehkai kaba nyngkong eh jong ki kynthei bad yn kyrshan lang da ka Sorkar Jylla. Te kumta kane ka MWSL kan plie lad ruh ïa ki klob jong ka Jylla ban ïoh ïashim bynta ha ka sien kaba nyngkong ha ka Indian Women’s League (IWL 2).
Ka jingthmu jong ka MWSL ka long katkum ka jinglah ban pynurlong ïa ka Meghalaya State League ha kine ki snem ba la lah, kaba dei ka lympung ïalehkai na ka bynta ki klob jong ki shynrang. Te kumta kito ki synjuk ïalehkai jong ka Jylla kiba ju pynlong ïa ki lympung ïalehkai jong ki kynthei, ki lah ban sei ïa ki kynhun kiba khur nam lahduh bad kiba wan ba-ar na ka bynta katei ka lympung ban pynlong da ka MFA.
Ki 8 tylli ki synjuk ïalehkai jong ki district ki la pynlong ïa kum kine ki lympung ïalehkai jong ki kynthei bad 13 tylli ki kynhun ki la pynthikna ïa ka jingïashim bynta ha katei ka lympung ka ban sa long ha ka Jylla. Ka jingïalang jong ki nongmihkhmat na ki klob bapher bapher lem bad ki dkhot ka MFA ka la long ha ka sngi Saitjaiñ ha kane ka nongbah na ka bynta ban ïamir jingmut lang ban ïakren ïa ki mat bapher bapher kiba ïadei bad ka MWSL.
Ki jaka ïalehkai, ka tarik ba thikna ban sdang, ki kynhun bad kiwei kiwei ki jingtip ba bniah yn sa pynbna hadien da ka MFA, hynrei ki ‘thei ïalehkai bad ki kynhun baroh kin long kiba shim khia ban pynkhreh na ka bynta katei ka lympung bad banrai ïa ka nam lahduh.
