Shillong, Jylliew 08
Ka Umphyrnai Presbyterian SS ka la pynjem khnap ïa ka St. John Bosco Boy’s HSS da shiteng dorjon (6-0 kol ha ka jingïalehkai Under-17 ki shynrang jong ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills District.
Ha kane ka jingïakhun pre-quarter final kaba la long ha ka sngi Saitjaiñ ha SAI Training Centre, ki khynnah ka Umphyrnai ki la lah ban ïalehkai bha naduh kaba sdang ha kaba u Batmeki Kharkongor u la khur syndon da ka hat-trick hadien ba u la ïoh ban thep ha ka minit kaba 11, 12 & 23. Ïa kiwei pat ki kol la thep da Stephanson Masynting (19), Robindor Kyrsian (37) bad u Nangehbok Mynlong (45).
Kumjuh ka Shillong College Higher Section Education ka la lah ban pynliem noh ïa ka Mawngap D. C. M. HSS da 4-0 kol. U Raphael Valfrid Tlang u la thep ar kol ha ka minit kaba 40 & 55, katba ïa kiwei pat la thep da u Medonbanshan Mylliemngap (42) bad u Buhdorskhem Rodborne (49).
Ka O. M. Roy Memorial HSS ka la jop da 4-0 kol ïa ka Government U. P. School na Mawryngkneng. U Lamshai Jana u la thep ar kol ha ka minit kaba 3 & 13, katba ïa kiwei pat la thep da u Hamedao Nongtdu (28) bad u Edmond Marngar (53).
Ka Tyrsad HSS ka la pynliem noh ïa ka Don Bosco HSS da 2-0 kol. Ïa kine la thep da u Teidorlang Rani ha ka minit kaba 11 bad u Aiboklang Dympep ha ka minit ba 37.
Lyngba kine ki nam jop, ka Umphyrnai Presbyterian, Shillong College, O. M. Roy Memorial bad ka Tyrsad ki la jam sha ka quarter final bad ïa kane yn pynlong ha ka 11 tarik mynta u bnai ha kajuh ka jaka.
Kat kum ka kyrwoh ba la pyllait da katei ka shlem treikam jong u DSO, la ong ba ka jingïalehkai quarter final kan long hapdeng ka H. Elias Memorial HSS pyrshah ïa ka Shillong Vidyalaya SS ha ka por 10 baje mynstep, kumjuh ka St. Anthony’s HSS ïa ka Rev. T. J. Jones Presbyterian School (11:15 AM), ka Tyrsad HSS ïa ka O. M. Roy Memorial (12:30 PM) bad ka Shillong College ïa ka Umphyrnai Presbyterian (1:45 PM).
