Shillong, Jylliew 08
Ha ka step phyrngab jong ka 08 tarik u Jylliew 2025, Sngi U Blei, ki dkhot ka Hynñiewtrep Youths’ Council (HYC) Jatap bad Shylla Area Unit ki la ïoh ka jingpyntip ba ki don ki nong Bangladesh kiba rung hapoh u pud u sam ka India lyngba ki jaka kiba hap ha Shylla, kita ka Patharghat bad Kalatek kiba don ha syndah jong ka khappud Indo-Bangladesh bad mar-mar ki la leit sha katei ka jaka.
Ki dkhot ka seng ki la leit sha katei ka jaka bad ki la ïoh ban bat ïa uwei u briew uba dei u nong Bangladesh lyngba ka jingïarap ki nongshong shnong.
La ïathuh ba katkum ka jingphla jong utei u nong Bangladesh kiwei pat kiba la ïa wan lang ryngkat ki la lait phet noh na katei ka jaka ha kaba katto-katne ngut ki la leit ban rung noh shapoh u pud ka Bangladesh bad ki don kiba la ïoh rung sha India.
Haba ka seng ka la kylli pyrthew na utei u briew uba la ïoh ban bat, u la pynpaw ba u dei na Bangladesh bad ha kane ka sngi u rung sha India ban ïarap ïa ki briew ba rung tuh sha India bad ruh ban leh ïa ki kam khaïi tuh ïa ki tiar ki tar ryngkat bad ar ngut ki nong India kiba shong ba sah ha shnong Kalibari, kiba kyrteng u Bono Biswa bad u Subash Baidya.
Ka seng ka la ong ba ïa kane ka kam pynrung tuh ïa ki nong Bangladesh la leh lyngba ka jingïarap jong kitei ar ngut ki nong India bad une u nong Bangladesh u ïoh kumba T.1000 na uwei ne ka briew ba ki pynrung tuh sha India. Ïa ka jingsiew sha kitei ar ngut na India, une u briew um tip.
“Ka kamram jong une u nong Bangladesh ka long ban pyllait ne ïalam lynti ïa ki briew na ka jingker kiba don ha khappud bad hadien kata ki sa wan shim kitei ki ar ngut pat ban ïalam sha Shillong bad kiwei ki jaka,” la ong seng.
Katkum ka jingïathuh ka seng, une u nong Bangladesh u la pynrung ïa ki briew na Bangladesh sha India lyngba ka khappud ha ka thaiñ Shella ka la ïaid mynta la shibnai tam bad man ka miet kumba 10 ngut eiei ki Bangladeshi ki ïa pynrung sha India ba kynthup ruh ïa ki kynthei bad tang ma u ruh u la pynrung kumba 50 haduh 60 ngut eiei ha kine ki khyndiat sngi ba la dep.
“Na ka liang ki nongïalam ka seng ki la leit ban aiti ïa utei u briew sha ki pulit ka Thanat Shella bad dawa ba dei ban shimkhia ban pynlong ka jingtohkit kaba thikna halor ki jingphla jong utei u nong Bangla bad ban kem ïa ki Dalal na India kiba la pynpaw haneng,” ong ka seng.
Shuh shuh, ka seng ka kyntu ruh ïa ki bor pulit bad ki shipai BSF ba kin shimkhia bha ïa kane ka kam khnang ban lap ïa baroh kiba donkti ha kane ka kam khaïi briew lyngba ka khappud bad kumjuh ruh ban lap bad kem ïa baroh ki briew kiba la wan rung tuh shapoh India katkum ka jingpynpaw jong utei u nong Bangladesh.
Ïa kane ka jingjia la pyntip ruh sha ki nongïalam ka CEC kiba la pyntip pat sha u SP ka East Khasi Hills bad SDPO, Sohra Sub-Division bad sha ki heh ka BSF Meghalaya Frontier na ka bynta ban shimkhia ïa kane ka kam. Na ka liang ka seng ka la ong ba kan sa nang peit pyrman bha ïa kine kiei-kiei nangne shakhmat.
