Shillong, Jylliew 08
Ka ophis jong ka Commissionerate of Food Safety and Standards Authority of India (FSSAI), hapoh ka jingïalam jong ka Kong DBS Mukhim, ka la pynlong ïa ka jingpynkhuid paidbah ha Khyndailad, Shillong.
Kane ka jingthmu ka long ban kyntiew ïa ka jingkhuid jingsuba bad ka jingkoit jingkhiah kiba long ki bynta kiba kongsan ha kaban pynneh-pynsah ïa ka jingkoit jingkhiah jong ki marbam bad ka jingbha-jingmiat jong ki paidbah.
Ïa kane ka jingpynkhuid ïa ka thaiñ Khyndailad la pynlong ha ryngkat ka jingïatreilang bad ki ophisar na ka Meghalaya Urban Development Authority (MUDA), kiba la ïasnoh kti lang bad ki nongdie madan ha surok ban pynshlur ïa ki ban pynkhuid ïa ki jaka ba don sawdong ki jaka die jingdie jong ki.
Ha kane ka jingpynkhuid paidbah, la pynkhuid ïa ki katto-katne ki jaka ba kongsan kum ka jaka hajan jong ka Marba Hub bad ka kynroh kaba mar pyrshah ïa ka OB Mall hapoh ka jingbthah jong ki bor pynïaid ka FSSAI kumjuh ïa ka lynti kaba leit sha Police Reserve, ha kaba ki nongdie madan ki bym dei ki trai shnong ki ju buh ïa ki jaka die jingbam ha ka por mynstep, la khang ban die jingdie bad la hukum ban pynkhuid bha.
Kane ka jingbuh ïa ki dukan ha surok ka la wanrah ka jinglum lang jong ka umphniang bad ki jakhlia kiba la mih na ka rukom shet jingbam bym khuid bad ka jingbret jaboh paidbah.
Ki nongleit nongwan mynstep ki la lyngngoh ban shem ïa ka Khyndailad kaba khuid bad kaba sngewtynnad, ha kaba la pynkhuid ïa ki lynti ïaid kjat bad ki jaka kiba ju don ki jaboh jabaiñ mynta ki la long kiba khuid. Ka surok kaba leit sha ka Bijou Cinema ka la long kaba khuid khamtam, da ka jingai khublei ïa ki nongdie jaiñ trai ri kiba la sdang ban pynkhuid ïa ki jaka jong ki naduh ka por 7 baje mynstep.
Haba kren sha ki lad pathai khubor, ka Kong DBS Mukhim, Deputy Commissioner ka Commissionerate of Food Safety (FSSAI), u la pynshai ba kane ka jingpynkhuid ha Khyndailad bad ha kylleng ka jylla ka dei shibynta jong ka mishon kaba kham heh ban kyntiew ïa ka koit ka khiah jong ki paidbah lyngba ka jingkoit jingkhiah bad ka jinglehkhuid.
Ka la ban jur ba ka jingpynkhuid ïa ki jaka ïew ka dei ka jingkitkhlieh ïa ki jaka paidbah bad ïa ki paidbah. Ka la pynpaw shuh shuh ba ka jingkhuid jingsuba ka long kaba kongsan bha ban pynthikna ïa ka jingkoit jingkhiah jong ki marbam ha ki jaka bam paidbah, kaba ïarap ban ïada na ki jingpang ba ïoh na ki marbam.
Kumta ka jingïatreilang na ki nongdie jingdie ha surok bad ki nongdie dukan ka long kaba kongsan bha. Ka Kong Mukhim ka la kdew ruh ba katei ka jingthmu ka pyni ïa ka jingpyndonkam ïa ki tiar saïan na ka bynta ban pynthikna ïa ki rukom bam kiba shngaiñ, kum ki jaka test jingbam kiba ïaid lyngba ka projek “Food Safety on Wheels” jong ka FSSAI, kaba lah ban test ïa ka jingjaboh ha ka jaka.
Khatduh eh, ka jingkynthoh jong ki paidbah ka la long kaba bha, ha kaba ka heh ophisar na ka FSSAI kala pynpaw ïa ka jingdonkam ban pynsngewthuh shaphang ka jingïadei hapdeng ka jingkhuid jingsuba bad ka koit ka khiah jong ki paidbah.
Ka la ban jur ïa ka jingdonkam ban ïatreilang bad ban pyntreikam ïa ka aiñ ha kaba thaw ïa ka mariang kaba khuid bad kaba shngaiñ na ka bynta baroh.
