Shillong, Jylliew 08
Ki shijur na Indore, Madhya Pradesh, u Raja Raghuvanshi bad ka kurim jong u, ka Sonam Raghuvanshi, ki la leit jngoh ïa katto-katne ki jaka ha ka por ba ki la wan ‘honeymoon’ sha ka Jylla ha shuwa ba kin jah rngai noh ha ka 23 tarik Jymmang.
Katba ïa ka met u Raja, la lap ha kawei ka riat ha ka 2 tarik Jylliew, ka jingwad ïa ka kurim jong u, ka dang ïaid shakhmat.
Ki la don ruh katto-katne ki dur-khih CCTV kiba la mih ha ki lad pathai khubor haba ïadei bad kitei ar ngut.
Kine harum ki dei ki jaka ba kine ar ngut ki la leit jngoh lem bad kiwei-kiwei ki jaka kiba don jingïadei bad kane ka jingjia.
Jymmang 21, 6 baje janmiet: Shillong
Kine ki shijur ki la wan poi ha Balaji Guest House kaba don ha Shillong, bad ki la pynrung kyrteng ïalade ha kane ka ïingbasa.
Jymmang 22, mynstep: Shillong
Ha ka por mynstep ki la mih ban leit sha Keating Road; ki la wai ïa kawei ka ‘Scooty’ bad ki la leit phai biang sha Balaji Guest House. Ki la mih na kane ka jaka khlem da bam ïa ka jingbam step. Ki la pyntip ha u Manager ba kin wan phai biang ha lane shuwa ka 25 tarik u Jymmang bad kin sa ‘phone’ lada ki donkam kamra. Na Shillong, ki la shong da katei ka ‘Scooty’ ban leit sha ka jaka jngohkai kaba pawnam – ka Sohra (Cherrapunji) da kaba rah lang ïa ar tylli ki synduk.
Jymmang 22, janmiet: Mawlakhiat, East Khasi Hills
Kitei ar ngut ki la poi ha ka shnong Mawlakhiat, East Khasi Hills, bad ki la buh ïa ka ‘Scooty’ ha ka jaka pynïeng kali kaba la pynïaid da ki paidbah nongshong shnong na bynta ki nongjngohkai pyrthei. Ki la shim ïa uwei u nonglam lynti ne ‘Local Guide’ ban ïaid kjat sha Shipara Homestay kaba ha ka shnong Nongriat kaba don ha kajuh ka distrik.
Jymmang 23, mynstep: Mawlakhiat, East Khasi Hills
Kitei ar ngut ki la mih noh na Shipara Homestay bad leit phai sha shnong Mawlakhiat khlem u ‘Guide’. Ha kajuh ka sngi ki la mih na Mawlakhiat bad ki la jah rngai noh hadien kata. La sdang ban pynlong ïa ka jingwad ha ki jaka ba marjan. U ‘Guide’ u la ïathuh ha ki pulit ba kitei ar ngut ki la pyntip ha u ba kin sa khmih hi ïalade bad kim shym la pyndonkam shuh ïa ka jingshakri jong u na bynta ban wanphai biang sha Mawlakhiat.
Jymmang 24: Sohrarim
U Sordar ka shnong Sohrarim ha East Khasi Hills u la pyntip sha ki pulit ba ki la lap ïa kawei ka ‘Scooty’ ba la shu iehnoh kumto ha ka shnong jong ki.
Jymmang 25: Sohrarim
Ki pulit ki la lap dien ïa u trai jong ka ‘Scooty’ uba la wan sha Sohra Police Station bad pyntikna ba ki shijur kiba na Indore, Madhya Pradesh – u Raja Raghuvanshi, 27 snem ka rta bad ka Sonam, 25 snem ka rta, ki la wai ïa katei ka ar-shaka.
Jymmang 26: Sohrarim
La sdang ban wad ruh ha kane ka jaka.
Jylliew 02: Ka Wei Sawdong Falls
Ka ‘drone’ jong ki pulit ka la ïohi ïa kawei ka met ha kawei ka riat kaba don harum ka Wei Sawdong Falls. La sei ïa katei ka met kaba la sdang kem pyut bad la pynithuh ba ka dei jong u Raja Raghuvanshi da ki bahaïing jong u.
Kum ban shu kdew hangne, ka jingwad ïa ka Sonam ka dang bteng haduh mynta-mynne.
