Shillong, Jylliew 08
U Bah Albert Pde uba dei u nongïalam lynti ne u Guide ïa ki nongjngohkai pyrthei na Mawlakhiat sha Nongriat, u la ïathuh ba ki don lai ngut kiba ïaid lang bad u Raja Raghuvanshi bad ka Sonam Raghuvanshi.
U la ïathuh ba u la ïohi ïa ki kine shynrang lai ngut kiba ïaid lang bad u Raja bad ka Sonam ha ka por ba kin kiew na Nongriat sha Mawlakhiat myn ha 23 tarik u Jym-mang 2025. Ïa kane u la ïohi ha ka por kumba 10:30 mynstep ha ka por ba la leit hiar ban leit buh ïa ki nongjngohkai pyr-thei sha Nongriat.
Une u nongïalam lynti u la ïathuh ruh ba kitei lai ngut kiba ïaid lang ki dei ki bar jylla namar ki ïakren ruh da ka ktien nongwei, katba ka Sonam pat ka ïaid suki nadien.
Haba U Nongsaiñ Hima u la pyrshang ban ïakren bad u Bah Albert Pde um kwah shuh ban batai jrong namar u la dep ban batai ha kine ki sngi ha kiwei ki nonglum khubor namar u dang bun kam ban ïalam ïa ki pulit NDRF, SDRF ban hiar biang sha Nongriat ban wad sakhi na ka jaka ba kine shikurim ki sah miet ha ka 22 tarik u Jymmang 2025.
Katkum ka jingïathuh u Bah Albert Pde ha u Sordar ka Elaka Mynteng, Bah American Rnga, u la ong ba u la ïohi ïa ka Sonam bad u Raja ha ka 22 tarik bad ha ka 23 tarik ha ka por ba u leit buh briew sha Nongriat.
U Sordar u la ong, katkum ka jingïathuh u Bah Albert Pde ba kita ki lai ngut ki shynrang ki la bud ïa u Raja bad ka Sonam ha ka por ba ki kiew na Nongriat.
Haba ïadei pat bad ka jingkynnoh ki briew ba kane ka thaiñ ka dei ka jaka ba bun kam sniew, u Sordar ka Elaka Mynteng u la ong, ba ïa ka met u Raja ki pulit ki la lap na Wei Sawdong bad ka la dei la ka jong ka hima bad kam dei shuh ka thaiñ jong ngi shane.
“Bad kiba leh kam sniew ban pynïap ïa u Raja ki dei beit na shabar shnong ym na ka thaiñ jong ngi,” la bynrap u Sordar shnong.
