Jowai, Jylliew 08
Ïa ka metïap jong u rangbah ba la tip kyrteng kum u Bah Lakhon Phawa uba la ngam jyllop ha ka Wah Umthe, la lap noh ha ka 7 tarik mynta u bnai.
Ka jingjia jngam jyllop jong u Bah Lakhon Phawa ka la jia ha ka 30 tarik Jymmang ha ka por kumba 5 baje janmiet hadien ba u la btuit ha katei ka wah katba u dang thmu ban leit phai sha la ïing.
Ïa ka metïap jong u Bah Lakhon Phawa kaba per ha sla um jong ka Wah Umthe la lap da ki nongleit khwai dohkha ha ka por 11.00 baje mynstep bad mar-mar ki la pyntip sha ki pulit ka district.
Namar ba kam don kano-kano ka jingsuba sniew, ki bahaïing ki la kyrpad ban pyllait noh na kaba leh Post Mortem bad hadien ba la pyndep ïa ki jingdonkam, ki pulit ki la aiti noh ïa ka met sha ki bahaïing.
