Jowai, Jylliew 08
Ka Jaiñtia National Council (JNC) Khliehriat Circle ha ka Sngi Saitjaiñ ka 7 tarik ha ka jinghiar jurip ïa ki dukan bam bad ki hotel, ka la lap ïa ka jingleh jakhlia jong katto-katne ki dukan die bam, kaba buh jingma shi katdei eh ïa ka koit ka khiah jong ki briew.
Kane ka jinghiar jurip jong ka JNC ka long ruh kum shi bynta ka jingkynmaw ïa ka jingrakhe ïa ka sngi ka jingkoit jingkhiah jong ka jingbam jingdih ne ka World Food Safety Day 2025 ha ryngkat bad ka pyrthei baroh kawei, ka seng da kawei ka lynti kala shim ïa ka sienjam ban leit khynra ïa ki dukan bad ki hotel, kumjuh ruh ïa ki restaurant kiba hap hapoh u pud u sam jong ka shnong Khliehriat ban peit ïa ka rukom treikam jong ki khamtam ha kaba ïadei bad ka jingkhuid jingsuba ka bam ka dih na ka bynta u paidbah.
Ha kane ka jingleit khynra ka seng hapoh ka jingïalam u Bah Symboh Baiar Sumer General Secretary ka JNC Khliehriat Circle ka la lap bad shem ïa ka jingleh jakhlia bad jingleh bym khuid ha ki katto katne ki dukan bad ki hotel ha Khliehriat, bad kane hi kan sa wanrah ïa ka jingeh kaba khraw ha ka jingkoit jingkhiah jong ki nongleit bam jingbam.
Ka seng ka la buh ruh ka jingmaham ïa kine ki dukan ba ki dei ban lehkhuid ïa ka bam ka dih ha shwa ba kin ai ha u paidbah ban bam khamtam ïa ki khynnah skul kiba ju rung bad mih na ka por sha ka por ha kine ki dukan.
Ka seng ka la ong ruh ba ka jingbam ka dei ka jingim u briew, te ha kane ka sngi rakhe jingkynmaw ïa ka sngi ka jingkoit jingkhiah, dei shisha ban buh hakhmat eh ïa ka khuid ka suba khnang ba kan ym wanrah ïa ki jingpang ba har rukom kiba lah ban ktah ïa ka jingim u briew, namar ka koit ka khiah ka dei ka spah bah ha ka jingim jong u briew.
Ka seng ka buh ruh ka jingkyrpad ïa ka Food Safety Officer ban peit sani ïa kine ki dukan ha manla ki por khnang ba kine ki dukan ruh kin nym shim sting ïa ka kam ha kaba ïadei bad ka jingbam.
Ka seng ka buh ruh ka jingmaham ba lada kine ki dukan kim lah ban leh ïa kaba donkam kata ban leh khuid khamtam ha ki jaka shet bam, ka seng kan ym shong kli kti bad kan sa leh da kaba tyngeh ïa ki, pynkut ka kyrwoh na u General Secretary ka JNC Khliehriat Circle, Bah Symboh Baiar Sumer.
