Shillong, Jylliew 08
Ka All Meghalaya Karate-Do Association (AMKA) ka la khot ïa ka jingïalang na ka bynta ki kmie ki kpa bad ki khynnah ïalehkai ha ka sngi Saitjaiñ ban pynsngewthuh ïa ki halor ka jingpynkhreh ïa ka kynhun ïalehkai na ka bynta ka 39th National Games 2027, ka ban sa long ha ka jylla Meghalaya.
Baroh ki thup jong ki nongïalehkai kiba la shah jied na ka bynta ka prokram kilanmet ki la ïashim bynta lang ryngkat bad ki kmie ki kpa jong ki.
Te kumta na ka liang ki nongïalam katei ka synjuk ki la batai lyngkot ïa ki halor ki jingthmu ban ai jinghikai haduh 20 bnai bad ka jingkyrshan bad ki jingtei kiba yn pynbiang da ka sorkar Jylla.
Ka synjuk ka la kyntu ruh ïa ka jingshimkhia jong ki khynnah ïalehkai bad ruh ka jingkyrshan na ki kmie ki kpa ban pyntikna ïa ka jingjop jong ka kynhun ïalehkai ka Jylla.
Ki nongïalam jong katei ka synjuk kiba la don lang ha katei ka sngi ki kynthup ïa u Bah Hunlang Lytan (President), Bah Banshanlang Kharumnuid (Vice President), Bah Ksan Kupar Warjri (General Secretary) kumjuh u Bah Donboklang Lyngdoh, Arjun Sewa bad Bah Mingson Rymbai, kiba long ki dkhot ka AMKA.
