Washington, Jylliew:
U President ka China, Xi Jinping bad u paralok jong u na US, Donald Trump, ki la ioh ban ïakren bun ktien hapdeng ka jingiakren phone jongki ha ka Sngi Palei ban pynbeit ïa ki jingïapher jingmut halor ka jingbuh khajna jong ki bad ki la mynjur ban don shuh shuh ki jingïakren hapdeng ki nongmihkhmat jong kine ki ri ha ka liang ka khaïi-pateng bad ban pyniaid beit biang ia ka khaïi- ka pateng kumba ka ju long baroh shi katta.
Ha katei ka jingïakren, u Xi u la kyrpad ruh ïa u Trump ba un shim rai bad leh ia kiei- kiei da ka jingshemphang bad jingpyrkhat jngai haba iadei bad ka mat jong ka ri dew lynnong Taiwan namar ba ki arliang mamla ki la pynlong ïa ka jingïakren bad u Trump halor ka jingkyrpad jong utei u nong-ialam ka China.
Hadien ka jingïakren phone, u Trump ha ka ‘Social Media’ la jong u la ong, “Nga dang shu pynkut ïa ka jingïakren phone kaba ïaid beit ïaid ryntih bad kaba seisoh bad u President Xi na China, ha kaba la ioh ban ïakren ïa ki katto-katne ki jingpynkylla haba iadei bad ka khaïi-pateng kaba ngi dang shu dep wanrah bad pyrkhat thymmai, bad kiba la nang mynjur lang”.
Ka jingpynbna paidbah ha Beijing ka la ong ba u Xi u la ïathuh ha u Trump ba ka China ka la pyntreikam da kaba shim khia bha ïa ka jingïateh kular ha Geneva ban pynduna ïa ki khajna.
Ka US ka dei ban peit ia ka jingkiew kaba la leh ha ka rukom kaba shisha bad ban weng noh ia ki sienjam kiba sniew kiba ka la shim pyrshah ia ka China, ong u Xi ha u Trump.
Ka jingiakren bad ka jingiatreilang ka long ka lad kaba biang tam, la ong u Xi. Namar u la ong ruh ba baroh arliang mamla ki donkam ban pyndonkam bha ia ka rukom iamir jingmut ha ka liang ka ioh ka kot bad ka khaii-pateng kaba la don lypa bad wad ia ki jingmih kiba jop ha ka mynsiem jong ka jing-iaryngkat bad ka jingburom ia ki jingeh jong uwei-pa-uwei.
Nalor jong kine, ka China ka dawa ba ka US ka dei ban ailad ia ka ban shimti bad synshar hi ia ka dew lynnong Taiwan, kaba ka la ju kam trai naduh mynshwa ba katei ka dew lynnong ka long ka shi bynta jongka hi bad man ka por ka ju phah leit syntiat ia ki shipai jongka kylleng sawdong jong katei ka dew lynnong Taiwan, ha kaba ki heh nongialam ka Taiwan pat ki ju pynpaw ka jingsngewkhia halor kane ka jingleh jong ka China bad ki ju pynpaw ruh ba kin ym ailad ia ka China ba kan shu leit knieh jubor ne leh donbor ia katei ka ri dew lynnong wat la ka long kaba rit.
La ong ruh ba ka China ka long ka ri kaba ar hadien ka India, lada ia nujor ia ka jingdon jong ki khynnah samla kiba pule ha US, ha kaba 2.7 lak ngut ki samla pule kiba don ha US ki dei ki samla pule jong ka China.
Kumta ka China ka la pynpaw ka jingpyrshah kaba jur ia ka rai jong ka US ban ym pdiang shuh ia ki khynnah pule ba nabar khamtam ia ki khynnah pule jong ka China.
