Shillong, Jylliew 08
U samla Bhakupar Bansai uba dei u nongïalam lynti ïa ar ngut ki shikurim na Indore, Madhya Pradesh sha Nongriat ha ka 22 tarik Jymmang 2025, u la ïathuh ba u la leit ban buh ïa u Raja Raghuvanshi bad ka Sonam Raghuvanshi sha Nongriat ha ka por 3 baje ne 3:30 eiei nohphai sngi.
Haba ïakren bad U Nongsaiñ Hima ha ka Sngi U Blei ka 08 tarik u Jylliew, u la ïathuh ba ka jingleit buh jong u ïa kitei ar ngut shikurim sha Nongriat ka dei ba u ïakynduh ïa ki ha lynti ha ka por ba u wan na bri. Bad u la kylli ïa ki la ki kwah guide ne em? Na ka liang jong ki ruh ki la jubab bad ong ba ngi kwah, kumta u la leit buh ïa ki da kaba shim ha ka dor T.500.
U la ïathuh ba u la ïalam ïa ki sha Shipara Homestay bad ha shwa ba un leit noh, u la kylli ruh ïa ki ba ha ka sngi kaba bud kata ka 23 tarik un wan shaw ne em ïa ki, hynrei ki ong ba ym donkam shuh.
“Ka jinghiar jong kitei ar ngut ki shikurim na kane ka lynti ka long kumba 2 kynta eiei bad ki poi ha Nongriat ha ka por 5:30 eiei janmiet,” ïathuh u samla Bhakupar.
Haba kylli pat na utei samla Bhakupar uba ïalam ïa kitei ar ngut shikurim sha Nongriat, ba kiei ki tiar ba kitei ki shikurim ki rah? Hynrei u la ong ba um da kynmaw bha ïa ki tiar ba ki shikurim ki rah ha katei ka sngi.
Shuh shuh, haba kylli biang, ba ki don ki briew kiba wan bud nadien jong kitei ar ngut shikurim por ba wanphai na Nongriat, u samla Bhakupar u la ïathuh, ba um da tip ïa kata namar ka jingwan ki nongjngohkai kiba bun kiba hiar bad kiba kiew.
Kum ban shu pynkynmaw hangne, kitei ki shikurim na Indore, Madhya Pradesh ki la wan Honeymoon sha Sohra bad ha ka 23 tarik Jymmang 2025 pat ki la jah rngai noh bad ïa ka met jong u Raja Raghuvanshi la lap na Arliang Riat Weisawdong, katba ïa ka Sonam pat haduh mynta ki pulit kim pat lapdien satia.
