Shillong, Jylliew 08
Ka National Commission for Women (NCW) ka la shimkhia hi dalade da kaba ïaid shakhmat bad ka ‘suo moto’ halor ka khubor kaba la pynkhuslai jingmut ha kaba ïadei bad ka jingshah pynïap jong u Raja Raghuvanshi bad ka jingjah rngai ka kurim jong u, ka Sonam ha Meghalaya ryngkat ki jingsuba ba ka lah ban don ka jingkhaïi briew sha Bangladesh.
“Ki jinglap ba dang shen, kynthup ïa ki jaiñ ba khah snam bad ki jingïathuh jong kiba ïohi ba ïa kitei ki ar ngut la ïohi bad ki shynrang ki bym lah ban ithuh, ki pyni ïa ka jingleh bymman kaba jur bha,” ong ka NCW ha ka rynsan lad pathai ‘X’.
Na ka liang ka Chairperson ka NCW, ka Vijaya Rahatkar ka la thoh sha ka DGP ka Meghalaya, Kong Ida-shisha Nongrang da kaba kyntu ban pynkloi bad pynjur ïa ka jingwad da kaba pyndonkam ïa ki ‘drone’, ki ksew, bad ki kynhun ba kyrpang.
Ka la ban jur ruh ban pynïar ïa ka jingtohkit kumjuh ban khmih bniah ïa baroh kiei-kiei kiba lah ban mih lem bad ki sakhi ‘forensic’ bad ban ïatreilang bad ki tnad treikam jong ka ri, lada donkam.
Ha kajuh ka por, ka NCW ka la bthah ba dei ban kem khlem da pynslem ïa kiba shah kynnoh donkti bad ban aiti ïa ka kaiphod kaba bniah hapoh 3 sngi.
Hashuwa, u Myntri Rangbah ka Madhya Pradesh, Dr. Mohan Yadav u la kyrpad ïa u Myntri ka tnad kam pohïing ka Sorkar Pdeng, u Amit Shah na bynta ka jingtohkit da ka Central Bureau of Investigation (CBI) halor ka jingjah rngai ka Sonam Raghuvanshi, ka kurim u Raja Raghuvanshi – ki shijur kiba na Indore, Madhya Pradesh.
“Ka Madhya Pradesh ka don ha syndah bad ka ïing ka sem jong ka Sonam Raghuvanshi ha kum kane ka por. Nga la ïakren ïa kane bad u Myntri Rangbah ka Meghalaya,” ong u Dr. Yadav ha ka rynsan lad pathai ‘X’.
U la ong ruh ba ki heh ophisar pulit ka Madhya Pradesh ki ïakren na ka por sha ka por bad ki heh ophisar ka Meghalaya.
“Nga la kyrpad ïa u Myntri ka tnad kam pohïing ka Sorkar Pdeng, u Amit Shah ban hukum da ka jingtohkit CBI haba ïadei bad kane ka jingjia,” ong u Myntri Rangbah.
U la ong ruh ba la pyrshang lut katba lah na bynta ka jingwanphai suk jong ka Sonam Raghuvanshi.
Nalor kane, ki bahaïing jong u Raja Raghuvanshi, ki la thoh shithi sha u Myntri Rangbahduh ka ri, u Narendra Modi, ban kyrpad ïa ka jingtohkit jong ka Central Bureau of Investigation (CBI) halor kane ka jingjia.
Ha kawei ka liang, u Myntri ka tnad kam jngohkai pyrthei ka Jylla, Bah Paul Lyngdoh ha ka Sngi Saitjaiñ u la ong ba ka Sorkar Jylla kan ym ïada ïa kino-kino ki ‘riew sniew na kane ka Jylla ne shabar, hynrei u la ban jur ba kam donkam ban don ka jingtohkit CBI halor ka jingshah pynïap u Raja Raghuvanshi bad ka jingjah rngai ka kurim jong u, ka Sonam.
Halor ka jingdawa na ka liang ki bahaïing na bynta ka jingtohkit CBI, u Myntri u la ong ba ka Special Investigation Team (SIT) ka dang treikam halor kane ka bynta nalor jong ki pulit.
