Imphal, Jylliew:
Ki shipai pahara ki la kem ïa lai ngut ki lehnoh, kiba dei na ki ar tylli ki kynhun ba la shah ñiew beaiñ ha Manipur, la ïathuh ki pulit ha ka Sngi Saitjaiñ. Ïa kine baroh la kem ha ka sngi Thohdieng ha Bishnupur, Kakching bad Imphal West, la ïathuh u heh shipai.
Uwei u dkhot jong ka kynhun lehnoh jong ka Kangleipak Communist Party (Peoples’ War Group) ba la shah ñiew beaiñ u la shah kem na ka thaiñ Wangoo Samushang ha Bishnupur namar ba u donkti ha ki kam dawa pisa, u la ong.
Une u lehnoh u la dawa pisa na ki skul, ki kolej, ki nongdie dukan bad ki dkhot ba la jied ha ka thaiñ Kumbi, la ong u heh shipai. Uwei pat u dkhot jong kane ka kynhun ruh la kem na ka thaiñ Elangkhanpokpi Mayai Leikai ha Kakching distrik, la ïathuh ki pulit.
U dkhot jong ka kynhun UPPK ka seng ba la shah ñiewbeaiñ u la shahkem na Khumbong Bazar ha ka Imphal West district. Ki bor pahara ki la bteng ïa ka jingkhynra bad ki jingpahara ha ki jaka ba marjan bad ki jaka ba kham ap jingma kiba don ha ki distrik ba sha ki jaka lum bad ki jaka them.
