Kyiv, Jylliew:
Ka tnat shipai suiñ jong ka Ukraine ka la iathuh ba ka Russia ka la ther haduh 9 tylli ki ‘namding bad 206 tylli ki drone ha ka jing-leit hiar thma shi miet- shi miet sha Ukraine ha ki bynta bapher jong katei ka ri.
Ki jingtip ba nyngkong ki pyni ba ka tnat iada suiñ jong ka Ukraine ka la ioh ban khanglad noh 174 tylli ki liengsuiñ ba khlem briew lane ki ‘drone’ jong ka Russia.
Ha kawei pat ka jingjia, ka tnat ïada ri jong ka Russia, ka ong ba ka la ioh khanglad 36 tylli ki drone jong ka Ukraine kiba wan poi na ki bynta Shathie jong ka ri- kynthup ha ki thaiñ jong ka nongbah Kursk, Bryansk, Kaluga, Smolensk bad ha Moscow.
La ong ba ka Russia bad ka Ukraine kim shym la lah ban poi sha ka jing-iakren iasuk wat hadien bun tylli ki jingpyrshang ban iakren ia pynbeit ha ka jinglam khmat jong ka United States bad kiwei de ki ri kum ka Qatar.
Kumta la ong ba kane ka jingiakynad ka la nang iaid bad nang bteng na ka por sha ka por wat lada ka la wanrah ia ka jingjulor bad jingduh nong ia baroh ar tylli ki ri hapdeng ka jingiakynad jong ki.
