Shillong, Jylliew 08
Ka Sonam Raghuvanshi bad u Raja Raghuvanshi kiba dei shikurim na Indore, Madhya Pradesh ki la ïa dih ‘coffee’ ha kawei ka dukan rit ha Pyndemdkhar haba ki la thait ha ka por ba ki kiew na Nongriat sha Mawlakhiat.
Kine shikurim ki la kiew na Nongriat ha ka por 6:30 mynstep jong ka 23 tarik Jymmang 2025 bad ynda ki la poi shiteng lynti ha Pyndemdkhar ki la ïeng ban dih coffee baroh ar ngut.
Kumta ki pulit ka Sohra Civil Sub Division, SDRF, NDRF ki la hiar biang na Mawlakhiat ban leit ïakynduh ïa ka trai kaba die ‘coffee’ ha Pyndemdkhar ban ïoh lum jingtip shuh shuh hadien ba kim lap dien shuh ïa ka Sonam haduh mynta.
Ban pynthikna ïa kane ka khubor, U Nongsaiñ Hima u la ïoh ban ïakren bad u Bah Steady Majaw uba dei Vice President ka Tour Guide Association of Meghalaya Sohra Unit (TGAMSU) uba la hiar lang sha Pyndemdkhar ha ka Sngi U Blei.
U Bah Majaw u la ïathuh ba ha ka por ba kitei shikurim ki ïa dih ‘coffee’, ka lah ban dei ha ka por shiteng sngi eiei bad ki ïa don tang ar ngut hi bad hadien ba ki la dep ban dih ‘coffee’ ki la leit noh.
Ka seng kan sa peit thuh lashai ban ïa leit wad biang ïa ka Sonam katkum ka jingpynïaid jong u SDPO, namar kim pat tip shaei ka jaka ban leit wad lashai.
Haba ïadei pat bad ka jingkynnoh jong u hynmen ba ka Sonam ka la shah rahbor ha ki ‘riew sniew, na ka liang u Bah Majaw u la ong, ba ki don bun ki briew kiba dei hi ki nongwan jngohkai (Tourist) kiba shim kabu ïa ki para nongwan jngohkai da kaba tuh ïa ki Camera bad ban pynthut ruh ïa ki.
Kumta, u la ong ba ki nongwan jngohkai ki kham shngaiñ bha ban ïalam ïa ki ‘guide’ kiba dei ki trai shnong, namar ka jingdon jong ki trai shnong ka long kum ka jingïarap na ka bynta jong ki lada ki ïaid kylleng kylleng ki jaka.
