Shillong, Jylliew 08
U Bah Titosstarwell Chyne uba dei u MDC ka Sohra ha ka Sngi Saitjaiñ u la hiar sha ka jaka ba wad ïa ka Sonam Raghuvanshi ha kshiad Lyngksiar harum Mawkma kum shi bynta ban leit ai mynsiem ïa ki pulit kiba la trei shitom ïa la ka kam.
Haba kren sha ki lad pathai khubor, u Bah Titos u la pynpaw ka jingsngewsih halor ka jingjah rngai ka Sonam Raghuvanshi kaba dei ka kurim jong u Raja Raghuvanshi, bad u la ong ba kumba la ïakren ha kine ki sngi ba la leit ba ka jingjia ka dei kaba sngewsih bad ka bym shym la poi pyrkhat bad khlem khmih lynti ba kan poi kum kane ka apot kaba da ki phew snem kam pat ju don kum kane ka jingjia hapoh ka thaiñ.
U la pynpaw ka jingsngewlem sha ki bahaïing bahasem jong kine shikurim khamtam ïa ki bahaïing bahasem jong u Raja Raghuvanshi kiba la lap noh ïa ka met ïap bad ka long kaba sngewsih halor kane ka jingjia.
Shuh shuh, u la ong ba kane ka jingjia kam don jingpynthut ïa ka rukom long rukom man ïa ka jinglong baroh shi katta ha kane ka thaiñ, ha kaba ki briew kiba nabar ki dang wan ban jngohkai.
U la ong ruh ba kane kan nym ktah ïa ka leit ka wan jong ki nongjngohkai namar kum kine ki jingjia ki ju jia beit hangno-hangno kum ki jingshah lute, ki jingshah pynïap, ki aksiden don kiba hap hi ruh kum kiba long ha ki thaiñ riat.
Na ka liang jong u, u ai khublei ïa ki kynhun na ka tnat Pulit, ka NDRF, ka SDRF, ka Local Taxi Association na Sohra, ki Tourist Guide, ki Local Tourist Guide kiba la mih shakhmat ban leh ïa la ki kamram ban ïarap wad lem ïa ka Sonam Raghuvanshi.
U la ong ruh ba ka Sorkar kan ai jingmut ruh ban ïakren bad ka tnat Tourist ban buh ïa ki ‘system’ ban don ïa ki Tourist Information Centre ha manla ki jaka ban pynrung kyrteng ïa ki nongwan jngohkai, shaei ba ki leit bad shano ki wan, da kaba pyntip wat ïa ka tnat Pulit, ki SDO, ki DC, khnang ba kan suk lada don kum kine ki jait jingjia ha kino kino ki thaiñ.
Ha kane ka sngi ka kynhun ki nongñiah taksi na Sohra ïa kaba la tip kum ka Sohra Taxi Owners Association ki la wan ban ïasnoh kti lang bad ki pulit ban wad ïa ka Sonam Raghuvanshi kaba dei ka kurim jong u Raja Raghuvanshi kaba dang jah rngai haduh mynta.
Haba ïakren bad u Bah Johnpaul Majaw uba dei u dkhot kane ka synjuk, u la ïathuh ba ki don haduh 10 ngut ha kane ka sngi kiba la wan ban ïasnoh kti lang bad ki pulit bad wad.
U la ong ba kaba la pynlong ïa ki ban mih shakhmat ka dei namar ba kim lah ban shu shah ne ban shu sngap da kaba shong ha ïing hynrei wat lada dei ïa kino-kino ki jaidbynriew ki don ka mynsiem para briew.
Ki la ong ruh ba lada ki sangeh kamai ban wan ïatreilang bad ki pulit kim khuslai namar ki shaniah ha uba na jrong.
U la ong ruh ba kin nang ïai bteng ban wad bad ïatreilang bad ki pulit. U la kyntu ruh ïa ki nongwan jngohkai hapoh ka jylla ba ki dei ban kiar ban shong ne ban wai da ki kali shimet ne arshaka na ka bynta ka jingshngaiñ ha ka leit ka wan.
