Shillong, Jylliew 08
U Luciano Spalletti u la pynbna ha ka Sngi U Blei ba u la shah weng noh na ka kam kum u coach ka Italy hadien ba ka la shah rem ha ka Norway ha ka lympung ïaknieh rung World Cup.
Wat hapdeng kane, un danghap ban peit ïa kane ka kynhun ha ka jingïalehkai pyrshah ïa ka Moldova ka ban long ha ka step jong ka Sngi Ba-ar.
Ha ka jingïalang bad ki nongthoh khubor, u Spalletti u la pynpaw ïa kane ka rai hadien ba ka Norway ka la jop da 3-0 ïa ka Italy ha ka sngi Thohdieng, kaba la long ka jingsdang jong ka jingjah burom ha kane ka jingïalehkai ban ïoh rung sha ka World Cup.
“Hynnin ka miet ngi la ïadon ryngkat bha bad u President u Gabriele Gravina. U la ïathuh ïa nga ba ngan sa shah weng noh na kane ka kam kaba nga bat kum u coach jong ka kynhun ïalehkai ka Iataly,” ong u Spalletti.
“Ngam shym la don jingthmu ban pyllait noh ïa kane ka kam. Nga la kham sngewbha ban dangïai sah ha kane ka kynhun. Ïa mynta ngan dangïai sah bad ka kynhun na ka bynta ka jingïalehkai pyrshah ïa ka Moldova, nangta ngin sa pynbeit ïa ka kontrak.”
