Nongstoiñ, Jylliew 09
Uwei u rangbah ïa uba la tip kyrteng kum u Bah Phoresstar Sohphoh, 58 snem ka rta, u la shong la sah marwei ha kawei na ki ‘lawbah ‘lawsan kaba ju khot kum ka ‘Law Nongjylleng ha ki thaiñ Warsanlyngdoh, mynta la kumba 20 snem eiei.
Shuh shuh la ïathuh ruh ba utei u rangbah u la sdang ban leit sah ha katei ka khlaw naduh u snem 2005. Ka daw kaba la pynlong ïa u ban leit sah sha khlaw ka dei namar ka jingban ka jingduk bad ka jingbym biang ha ka kamai-kajih.
La ong ruh ba utei u rangbah u don ïa ka thong ban sumar ïa ki jingthung jingtep barim kaba long ruh kum shi bynta ban pynneh-pynsah ïa ka jingitynnad ka mei mariang bad ïa kiei-kiei ki rukom jong ka jinglong tynrai haba ïadei bad ka rep ka riang u khun Khasi kaba la ju mlien naduh kulong-kumah kumba la ju ïalam da ki mynnor.
Ha ka jingïaid lynti jong u Bah Phoresstar mynba u dang poi nyngkong ha katei ka khlaw, u la mad jingeh shibun bha bad u la ong ba kumba 3 snem eiei u la hap ban bam tang da ki jhur khlaw khlem ka ja namar ka jingbym don pisa ban thied khaw tad haduh ban da long katto-katne ki jingthung kiba pynmih pisa ïa u.
U Bah Phoresstar u ju bam beit tang arsien ha ka shi sngi namar ba la mlien naduh ka por bym ju ïoh bam bad um ju bna ruh wat kumno ban dih sha.
Ban ïakynduh bad u Bah Phoresstar, ka la shimpor haduh 4 kynta na sor Nongstoiñ kynthup ïa ki surok ba khohruh-khohram nalor kata hap ïaid kjat ruh haduh 1 kynta tam bad ka shem jingeh shibun ha ki aïom lyiur. Kumta u Bah Phoresstar ha ka por tlang u ju thied lypa ïa u khaw, sabon, bad kiwei kiwei ki jingdonkam ba kham kongsan bad u ju pyndonkam beit ban leit jingleit bad ban kit jingkit da ki kulai kiba u la ri bad u don haduh hynriew tylli ki kulai.
Ki jingthung jingtep kiba u Bah Phoresstar u thung ki kynthup ïa u sohphan, sohtrun, Sohpieng, sohniamtra, sohplom, sohphareng bad ki soh khlaw ba bun jait nalor kine u thung ruh ïa u phandieng, phankaro, u pai, ka kait, u sohmrit khlaw, u synsar bad u dieng coffee.
Shuh shuh la ong ba tang na ki dieng coffee kiba u dang sara thymmai mynta u snem ki la kot haduh 2600 tam ki tynrai dieng ïa kaba u la thung nalor ki barim kiba la soh man la u snem.
Kaba kham sngewtynnad shuh shuh ban ïohsngew ka long ba haba la kylli ïa u la u la ïoh ne em ka baibam tymmen, u la jubab da kaba u la ong tang kaba u kamai manla u snem um lah shuh ban bam te balei un leit wad na ka Sorkar nalor kata ka Sorkar ka thlia kane bad katai.
Shuh shuh kumba long mynta, katei ka khlaw kaba utei u rangbah u la leit sah, ka la kylla noh kum kawei na ki bri ha kaba kiwei ruh ki briew ki la sdang ban wan ban thung ban rep hadien ba ki la ïohi ïa ka jingseisoh.
