Shillong, Jylliew 09
Ka kurim kaba la jah rngai jong u briew na Indore u Raja Raghuvan-shi, ïa kaba la lap ïa ka metïap ha ka jingwan ‘Honeymoon’, ka la shah kem noh ha kaba ïadei bad ka jingkynnoh donkti ban pynïap ïa la u kurim. Katkum ka khubor na ki pulit, ka kurim ka Sonam, kaba la suhbuit bad thong pisa ïa ki briew ba kin pynïap ïa la u kurim.
Ka khubor ka la ïathuh ba la lap ïa ka Sonam ha kawei ka ‘dhaba’ ha Ghazipur, Uttar Pradesh bad hadien kane la ïalam noh ïa ka sha Ghazipur Medical College na ka bynta ka jingsumar, ha kaba la ong ba ka la aiti noh ïa lade ha ki pulit bad hadien kane, ka la shah kem noh.
Nalor ka Sonam, ki pulit ka jylla kiba la hiar sha Madhya Pradesh bad Uttar Pradesh ban pynlong ka jingkhynra hadien ka jinglap ïa ki sakhi jong ka jingdonkti katto-katne ngut, ki la ïoh ban kem noh nyngkong ïa ki 3 ngut bad kine ki kynthup ïa u Vishal Chauhan, Raj Kushwaha bad u Akash Rajput.
U Assistant Inspector General of Police (A), Dr. S.R Marak, u la ong hadien ka jingtohkit kaba bniah bad ka jingïatreilang bad ar tylli ki jylla, ki lai ngut ki briew ki la shah rah ha kaba ïadei bad katei ka jingjia shah pynïap jong u Raja, kata ar ngut na Indore ha Madhya Pradesh bad uwei na Lalitpur ha Uttar Pradesh.
Katba ïa uwei u briew ba kyrteng u Anand pat uba la suba donkti lang ha kane ka kam pynïap briew, la ïoh ban kem noh hadien ka jingthwet kaba jur hadien ka jingphet rieh ka jong u, na ka jingshah rah jong ki 3 ngut.
Kane ka jingjia shah pynïap jong u Raja, hato ka dei ba u la shah pynbiej ha la ka kurim ka Sonam ban leit ‘Honeymoon’? Katkum ki khubor ba la paw ha ki lad pathai khubor na ka jingkren jong ka kmie u Raja, la ong ba hadien ba ki la dep ban ïashong kurim, ka la don ka jingpynbeit ban leit ‘honeymoon’ hynrei namar ba u ‘pandit’ ka Sonam u la ong ba ym pat long ban mih shabar, kumta la ong ba u Raja u la ong ban nym leit shuh bad ba kin sa leit ha kiwei pat ki por.
Katkum ka jingïathuh jong ka kmie u Raja, ka la ong ba na ka liang u Raja u la pyntip ba kin leit kai noh sha Shillong namar ba ka Sonam ka la dep ban ‘book ticket’ bad pynbeit nadong-shadong. Kane ka la pynkyndit namar ka khlem ïathuh ïano-ïano bad wat ïa u Raja hynrei ka la shu pyntip ba ka la dep ban book ticket. Kane ka la pynsuba sniew ruh ba imat ka Sonam, ka la leh ïa kane hadien ba ka la dep ban ïasuhbuit bad u Raj Kushwaha, uba dei baïeid jong ka, uba ka la ïakynduh naduh ki por shwa ban ïapoi shongkurim bad u Raja.
Ka tyllong khubor ka la ïathuh ruh ba haba wan sha Shillong, nalor u Raja bad ka Sonam, ki lai ngut ki briew jong ka Sonam kiba ka la ai kontrak ban pynïap ïa la u kurim da kaba ïasuhbuit bad u Raj ruh ki la wan lang sha Shillong bad hiar lang sha Sohra. Kane ka la paw shai ruh hadien ba uwei na ki ‘guide’ ha Sohra u la ïathuh ba ha ka por ba ki kiew na Nongriat, u la lap ïa ki shikurim lem bad 3 ngut kiwei pat ki briew kiba ïaid lang hynrei um sngewthuh pat ïa kaei kaba ki kren namar ki kren da ka ktien Hindi.
Lah ban pynkynmaw ba ki shikurim ki la jah rngai ha ka 23 tarik u Jymmang bad dei ha ka 2 tarik u Jylliew ba la lap ïa ka metïap kaba la kem pyut jong u Raja Raghuvanshi. Hadien ka jinglap ïa ki sabut kiba biang, ki pulit ki la pyntip ba u Raja u la shah pynïap bad ha kaba ki la sdang ka jingtohkit ban buddien halor kane ka jingjia bad tang ha ki 7 sngi, ki la lah ban pynpaw ba ka jingïap jong u Raja, ka dei lyngba ka jingïalam lynti bad suhbuit jong ka Sonam kaba dei ka kurim ka jong u.
