Shillong, Jylliew 09
Ka Sonam Raghuvanshi ka la pynbiang lut nadong-shadong haba ïadei bad ki ‘booking’, kynthup ïa ka leit ka wan bad ka jaka sah, na bynta ka jingleit ‘honeymoon’ jong ki sha Meghalaya – hynrei kam shym la pynbiang pat ïa ka tiket ban wanphai, ong ka kmie u nongkhaïi ba la shah pynïap (Raja Raghuvanshi) na Indore ha ka Lah Sngi U Blei.
Katkum ka jingïathuh ka Uma Raghuvanshi sha ki lad pathai khubor, ka Sonam ka lah ruh ban pynjlan ïa ka jingleit jong ki sha Shillong Hynrei ka Sonam kam shym la ai kino-kino ki jingtip ba bniah halor katei ka jingleit jong ki sha ki ar longïing.
“Ka Sonam ka la pynbiang ïa ki tiket na bynta katei ka jingleit, bad ka lah ruh ban pynjlan ïa ka jingleit jong ki sha Shillong, naba u khun jong nga um tip shaphang katei ka thaiñ. Ka kmie jong ka, ka la ïathuh ba ki la leit sha Shillong ha u snem ba la dep,” ong ka kmie u Raja.
Ki heh ophisar ki la ïathuh ba kine ar ngut ki la mih ha ka jingleit jong ki sha kane ka Jylla ka Thaiñ Shatei Lam Mihngi da kaba deng lut ïa baroh ki jingdeng ksiar jong ki. Katba ka Sonam ka la leit beit-beit sha Kad Liengsuiñ na ïingsah ki kmie ki kpa jong ka, u Raja u la mih na ïing jong u da kaba deng ïa ki jingdeng ksiar kiba shongdor palat T.10 lak, ba kynthup ïa ka sati mawkordor, u kynjri, bad u jingdeng kti.
Haba ka kmie jong u Raja ka la kylli ïa u, u la ïathuh ba ka Sonam ka kwah ïa u ba un deng ïa ki.
“Lada ka Sonam ka donkti ha kane ka jingpynïap, te dei ban rai pynrem da kaba phasi ïa ka. Ki pulit kim shym la ïathuh wat ha ka por mynstep ba la lap ïa ka Sonam. Ka dei ban don da ka jingtohkit CBI. Lada ka Sonam kam shym la leh eiei, balei yn kynnoh ïa ka? Ka Sonam ka don ka jinglong kaba bha, ka ju kdup ïa nga,” la ong ka Uma.
Ka la buh jingkylli ruh ba lada ka Sonam ka ieid ïa u khun jong ka, balei kan iehnoh ïa u ban ïap?
“Kumno ka don hapdeng ka jingshngaiñ? Baroh ki briew kiba don sha lyndet jong kane ki dei ban shah pynshitom da kaba tyngeh,” ka la ong.
Ki heh ophisar ki la lap ïa ka Sonam ha ka jingbym tip briew na kawei ka ‘Dhaba’ ha Ghazipur, Uttar Pradesh. La ïalam noh ïa ka sha Ghazipur Medical College ban ïoh ïa ka jingsumar, ha kaba ka la pyndem noh hakhmat ki pulit bad hadien kata la kem ïa ka.
Ki pulit ki la kynnoh ruh ba ka kurim jong u Raja ka don ka jingïadei shabar nalor u kurim jong ka – kaba la kynnoh, kaba la pynlong ïa ka ban siew da ki nongpynïap briew ban pynïap ïa la u kurim. Dei ma ka kaba la saiñdur ïa katei ka jingpynïap ha ryngkat ka jingïasnoh kti lang u samla jong ka, u Raj Kushwaha, bad ka la pyndem noh namar ka jingshah pynbor, ki la ong.
Shuh shuh ka jingtohkit ba ha shuwa ka la lap ba ka Sonam ka ju ïakren bunsien bad u Raju Kushwaha. Ki heh ophisar ki la lap ruh ïa ki CCTV ha kaba la pynithuh ïa ki lai haduh saw ngut ki briew na Madhya Pradesh – kiba dei ki nongpynïap briew.
