Shillong, Jylliew 09
Ka Portugal ka la ïoh ban rah ïa ka nam lahduh ha ka sien ba ar jong ka UEFA Nations League hadien ba ka la lah ban pynliem noh ïa ka Spain lyngba ka tie-breaker da 5-3 kol.
Ha ka jingïakhun final kaba la long ha ka shiteng synñia ka Lah Sngi U Blei ha Allianz Arena kaba ha Munich, Germany, ka jingïalehkai ka la long kaba itynnad bad haduh kaba kut jong ka ‘extra time’ baroh ar kynhun ki la ïakhaid mar 2-2 kol. U khlur ïalehkai ka Portugal u Cristiano Ronaldo u la lah ban kynjoh sha 138 kol ha ka jingïalehkai bar ri.
Wat la ka Spain ka la ïoh ban thep kol nyngkong lyngba u Martín Zubimendi ha ka minit kaba 21 hadien ka jingïarap pynbuh da u Nico Williams. Hynrei hadien 5 minit ka Portugal ka la lah ban pynïakhaid kylla lyngba u Nuno Mendes.
Hadien ba la bteng ïa ka jingïakhun jong ka kylla miet, ka Spain ka la pynbud biang ïa ka kol ba ar lyngba u Mikel Oyarzabal ha ka minit kaba 45 ha kaba u rangapkol ka Portugal u Diogo Costa um shym la lah ban khanglad na kane ka jingshah thep. Hapdeng kane ka jingïakhun, ka Portugal ka la pyrshang ban ïakhun tyngeh bad dei ha ka minit kaba 61 ba u Ronaldo uba la 40 snem ka rta, u la lah ban thep ïa ka kol kaba 138 ha ki lympung ïalehkai bar ri, na ka bynta ban ïakhaid mar 2-2 kol.
Kumba ka paw baroh ar kynhun ki la ïoh ïa ki kabu kiba biang lyngba u Bruno Fernandes bad u Lamine Yamal kiba la pyrshang ban thep kol, hynrei baroh ar ngut kim shym la lah ban pynurlong ïa la ki kynhun.
Lah ban kdew ka Portugal ka la rah teng ïa ka nam lahduh kaba nyngkong eh ha ka Nations League ha u snem 2019 hadien ba ka la lah ban pynliem noh ïa ka Netherlands da 1-0 kol.
Haba phai sha ka jingïakhun ban ïaknieh ïa ka kyrdan balai, ka France ka la jop da 2-0 kol ïa ka Germany. U Kylian Mbappe u la thep kol nyngkong na ka bynta ka France ha ka minit kaba 43 bad u Michael Olise u la pynbud ïa ka kol ba ar ha ka minit kaba 84.
Kum ban shu pynkynmaw ha ki jingïakhun semi final, ka Germany ka la shah rem ha ka Portugal bad ka France ka la shah rem ha ka Spain.
