Shillong, Jylliew 09
Ka Uzbekistan ka la lah ban pynthikna ha ka sien kaba nyngkong eh ban ïoh rung sha ka World Cup hadien ba ka la ïakhaid khlem don ban thep kol pyrshah ïa ka UAE bad ban long ka kynhun kaba san ban ïoh rung ryngkat bad lai tylli ki kynhun ki ban pynlong ïa kane ka lympung.
Ka Jordan ruh ka la thaw ïa ka khana pateng da kaba ka la jop ïa ka Oman da 3-0 kol bad kane ka long hadien ka jingshah rem jong ka ha ka Uruguay da 5-0 kol ha u snem 2014.
Ha u snem 2018, ka India bad ka Uzbekistan ki ïa bud mar ryngkat ha ka kyrdan jong ka FIFA. Ka India ka la don ha ka kyrdan kaba 98, katba ka Uzbekistan ha ka kyrdan kaba 95. Hadien hynñiew snem, ka Uzbekistan ka la lah ban pynurlong ban rung sha ka World Cup ha ka sien kaba nyngkong eh, katba kiba bun ki la pynpaw ba ka India ka dang shimpor haduh 200 snem ba kan ïoh rung sha katei ka lympung kaba heh tam ha ka pyrthei.
Ka India ka la wan ha ka kyrdan ba lai jong ka Group-A jong ka wat ba ar ha ka FIFA World Cup 2026 AFC Qualifiers da kaba jop shisien na hynriew tylli ki jingïakhun.
Ka jingshah rem pat da 2-1 pyrshah ïa ka Qatar ha ka jingïakhun ba khatduh ka la pynskhem ïa kaei ïa kaba kan dang shitom ban ïoh rung sha ka World Cup.
Kane ka jingbymlah ban pynlong ka la wan jia ha baroh ar tylli ki kynhun jong ki senior’ bad ki samla (youth). Ki kynhun U-17 bad U-20 kim shym la lah ban rung sha ka Asia Cup wat la ki la don ha ki kyrdan ba kham shakhmat.
U coach barim ka Mohun Bagan, u Sanjoy Sen um shym la kren beiñ haba bishar bniah ïa ka jinglong jingman jong katei ka kynhun. “Ka India, ka donkam ïa ka jingpynkylla kaba pura ha ka rukom ban kyntiew ïa ki nongïalehkai bad kumjuh ruh ïa ki rukom pynïaid ïa ka lympung ïalehkai. Ym don ki nongïalehkai mynta kiba don ïa ka jingthmu bad ka jingaiti lut na ka bynta ban kyntiew ïa ka jingïalehkai sha ki kyrdan kiba kham shajrong.”
Ki jingeh ha ka jingtei ban kyntiew ka long kaba hiar arsut. Hadien ka juk ksiar hapoh ka jingïalam jong u coach ba paw u Syed Abdul Rahim, ka phutbol ha India ka la long kaba hiar bha wat hadien la wan ban shimti kumba 40 ngut ki coach bapher bapher ïa kane ka kam.
Ka jingbymlah jong ka AIFF ban pynroi ïa ka jingtbit ha ka kam nonghikai ha kaba ka la lah ban pynmih tang 26 ngut ki nonghikai (Pro License Coach) ha ki sawphew snem hadien ka por jong u Rahim.
Ka rukom pynïaid ïa ki league kam long kaba kiew. Haduh u snem 1996, ka India kam pat don national league, kaba khanglad ïa ka jingkiew jong ki nongïalehkai. La sdang ïa ka National Football League ha katei ka snem, ha kaba ki don tang 12 tylli ki kynhun kiba ïalehkai haduh lai bnai khlem kiew kyrdan ne pynhiar kyrdan – kaba ïapher shibun shah na ki league ha Europe.
Ka Indian Super League (ISL), kaba la sdang naduh u snem 2014 da ka jingkmen kaba khraw bad ka jingbei tyngka jong ki riew shimet, ka la wanrah ïa ka jingkmen kaba thymmai, hynrei ka la ïaleh ban pynneh ïa ka jingsngewtynnad kaba slem. Hynrei ka jingeh ka long ba don tang 13 tylli ki kynhun kiba la shim bynta bad 24 tylli ki jingïalehkai ha ki hynriew bnai ka duna bad kane kam pat shym la lah ban sei ïa ki nongïalehkai kiba kynsai.
Lah ban kdew ba ïa ka World Cup 2026 yn pynlong ha United States, Canada bad Mexico ha kaba kin don 48 tylli ki kynhun ïalehkai.
