Shillong, Jylliew 09
Ka Hynñiewtrep Youths’ Council (HYC) ha ka Lah Sngi U Blei, ka la ïoh kem ïa u Bansuklang Kharsyntiew uba ju khot sin u Tit, uba la dung da ka tari ïa ki ar ngut shipara ha Mawlai Nongkwar Block-13.
Kane ka jingjia shah dung tari ïa ki ar ngut shipara ka dei ha ka step phyrngab jong ka 05 tarik u Jylliew 2025, ha ka por 3 baje eiei.
U Tit u dei ruh u nongdih drok ba ka seng ka la ïoh ban kem teng mynshwa ha ka por ba ka la khynra ïa ki briew ba dih drok ha nongbah Shillong.
Ka seng ka la ïoh kem ïa u Tit na Umlyngka Mission ha ka 09 tarik u Jylliew 2025, katba u dang leit kai bad ki paralok ba trei ha Umlyngka.
Haba ïoh ban kylli bniah halor ka jingjia ha Mawlai Nongkwar ha ka step phyrngab jong ka 05 tarik Jylliew 2025, ha kaba u Tit u la dung da ka tari ïa ar ngut shipara, u la ïathuh ba ma u bad u paralok ba wan lang da kawei ka kali kamai ha katei ka step ki la thmu ban tuh nar, tuh tape bad tuh speaker na ka kali kaba don ha karkhana, hynrei ki la shah bat noh ha ki ar ngut shipara ryngkat bad ki briew ba sah ha katei ka jaka.
U la ïathuh ba hadien ba ki la bat ïa u, u la phet biang bad u sa sei da ka tari ban dung ïa kitei ar ngut shipara, uwei na ki bynta jong ka lbong bad uwei pat na ka kti.
Hadien katei ka jingjia, u Tit u la ïathuh ba u la phet noh bad leit thiah ha jingkieng Umshyrpi.
Ka jingïoh kem ka HYC ïa u Tit ka dei hadien ba ka la ap thap ban ïoh kem namar ba u rieh sha ki bynta jong ka jingkieng Umshyrpi bad ha ka por ba u (Tit) leit sha Umlyngka, ki dkhot ka seng ki la kem ïa u bad rah sha ophis ka seng kaba don ha Mawlai Nongkwar.
Hadien kane, na ka liang ka seng ka la leit ban aiti noh ïa u Tit sha ki pulit ka Thanat Mawlai.
