Ka jingshah pynïap dang shen jong u Raja Raghuvanshi ha ka por ba u leit ‘Honeymoon’ sha Sohra, Meghalaya, ka la pynkyndit ïa ka jaidbynriew, ha kaba ka la pynpaw ïa ka jingïathuhkhana kaba pynkhih mynsiem ïa ka jingleh donbor bad jingleh thok ba la thmu lypa. Kaei kaba la sdang kum ka jingphetwir kaba sngewtynnad na ka bynta kitei ar ngut kiba dang shu ïapoikha thymmai na Indore, ka la kylla long ka khana kaba sngewsih jong ka jingshah pynïap, kaba la poi sha ka jingïap jong u Raja bad hadien kata ka jingshahkem jong ka tnga jong u, ka Sonam Raghuvanshi.
Ka jingkhawai shongkurim ka la kylla long pynban ka jingban sma ïap (nightmare). Ha ka 20 khlieh tarik u Jymmang, 2025, u Raja bad ka Sonam, kiba la ïa poi shongkurim tang katto-katne sngi shwa, ki la wan poi sha Meghalaya bad hiar sha Sohra ban pynsah kynmaw ïa ka jingïashongkurim ka jong ki ne kata ka ‘Honeymoon’ jong ki ha ki lum ba itynnad jong ka Sohra. Ka jingleit jong ki ka la ïalam sha ka jingkieng tynrai ba im kaba don ar mala kaba pawnam ha Nongriat. Hynrei ha kaba kut jong ka sngi, kitei ar ngut ki la jah rngai khlem lap dien shuh. Kawei ka dak kaba la iehnoh ka dei ka ‘scooty’ ba ki la shim wai, kaba la lap ba la iehnoh ha ka surok Shillong-Sohra.
Ka jinglap ïa ka metïap bad ka jingpynpaw ïa ka jingïathaw buit ha kaba rieh. Hadien katto-katne sngi, kata ha ka 2 tarik u Jylliew, la lap ïa ka met jong u Raja, kaba la kem pyut ha trai jong kawei ka krem kaba don hapoh ka wahduid Wei Sawdong. Ka jingdon jong ka wait kaba la rkhiang snam hajan ka la ai jingmut ïa ka jingleh bymman. Uwei u Nongïalam lynti ha ka thaiñ u la ïathuh ba u la ïohi ïa kitei ar ngut ryngkat bad lai ngut kiwei pat ki briew ki bym ithuh bad kiba la kren da ka ktien Hindi ha ka sngi ba ki la jah, kaba la ai ka jingïalam kaba kongsan ïa ki nongtohkit.
Ka jingtohkit ka la shim ïa ka jingkylla kaba khraw haba la kem ïa ka Sonam ha ka 9tarik Jylliew ha Ghazipur, Uttar Pradesh. Ki bor pynïaid ki kynnoh ba ka la pynlong ïa ka jingpynïap ïa u lok jong ka da kaba thung ïa ki nongpynïap briew kiba la ai kontrak. La kem saw ngut ki briew ha kaba ïadei bad katei ka kam runar, kynthup ïa uwei na ki paralok ba la kynnoh ba u dei u paralok jong ka Sonam.
Ka jingthmu jong katei ka jingpynïap briew kam pat shai bha. Katba ki don kiba mutdur ïa ka jingmyntoi pisa ne ki jingsngewsih shimet, ki daw kiba shisha kim lah satia ban sngewthuh pura. Ka mukotduma ka la buh jingkylli shaphang ka jinglong kyntang jong ka jingshongkha bad ka jingjngai kaba ki briew shimet ki lah ban leit ban buhrieh ïa ki kam barieh jong ki.
Ki jingktah ha ka liang ka aiñ bad ka imlang-sahlang. Kane ka jingjia ka pynpaw ïa ka jingdonkam ban tohkit bniah bad ka jingdonkam ïa ka hok ban jop. Ki pulit Meghalaya, ryngkat bad ka jingïarap na ki tnat jong ka ri, ki la trei shitom ban pynïasohlang ïa ki jingjia kiba la ïalam sha ka jingïap jong u Raja. Ka mukotduma ka long kum ka jingpynkynmaw ïa ki jingeh jong ka jingïadei para briew bad ka jinglah ban don ki jingthmu kiba buhrieh.
Ka jingïaroh kaba khraw ka leit sha ki pulit kiba la trei shitom khamtam eh hapdeng ka jingeh bad ka jingshah pynbud nam jong ka Jylla khamtam lei na ka liang kita ki lad pathai khubor kiba ngi ju tip kum ki National Media bad ruh na ka liang ki bahaïing bahasem jong ki shikurim, kiba la shu kynnoh khlem da tip shwa ïa kaei kaba jia. Ka jingtrei shitom jong ki pulit ka jylla, ka la pyllait hi war na kine kiei-kiei baroh.
Ka jingshah pynïap jong u Raja Raghuvanshi ha ka por kaba la dei ban long ka por kaba kmen ka long ka jingpynkynmaw kaba shai bha ïa ka jingdum kaba lah ban rieh hapoh ka sla jong ki jingïadei para briew. Katba ka jingtohkit ka dang ïaid shakhmat, la kyrmen ba yn sa pynurlong ïa ka hok, kaba ai katto-katne ka jingshai jong ka jingkhang ïa ka longïing kaba sngewsih bad kaba pynthikna ba kum kane ka jingjia ba sngewsih kan ym jia biang.
