Shillong, Jylliew 09
Ki pulit ka Meghalaya, ki la seisoh haba ïadei bad ka jingjia shah pynïap jong u nongjngohkai pyrthei na Indore, u Raja Raghuvanshi, uba la shah pynïap ha ka jingwan ‘honeymoon’ sha ka Jylla.
Ka jingtohkit ka la ïalam sha ka jingshah kem jong ka kurim jong u, ka Sonam lem bad saw ngut kiwei pat, ba kynthup ïa u Raj Kushwaha (21 snem ka rta), ha kaba la suba ba ka Sonam, ka don ka jingïadei bad u.
Na ka liang u Myntri Rangbah, Conrad K. Sangma u la ai khublei ïa ki pulit ka Jylla halor ka jingtohkit kaba sted bad kaba bniah, kaba la ïalam sha kitei ki jingshah kem.
Haba kren sha ki lad pathai khubor, u la ong ba ïa kane ka mukotduma ka la seisoh hapdeng kiba bun ki jingeh bad u la ai burom ïa ki pulit kiba la lap ïa ki sabut kiba skhem kiba pynïasoh ïa kiba shah kynnoh bad katei ka kam runar.
Ka jingtohkit ki pulit ka la lap ba ka Sonam ka la siew ïa ki nongleh kam sniew ban pynïap ïa u kurim jong ka. Ïa kane ka jingkhynra la pynlong ha ryngkat ka jingkyrshan jong ki pulit ka Madhya Pradesh bad Uttar Pradesh, kumjuh jong ka Intelligence Bureau.
Ki tnad treikam ki la hun haba ïadei bad ki sabut ba la wanrah da ki pulit ka Meghalaya bad hadien kata ki la ïarap ha kaba kem ïa kitei ki briew.
U Myntri Rangbah u la pyntip ba ka Jylla kan ïai bteng ban buh hakhmat eh ïa ka jingshngaiñ jong ki nongjngohkai pyrthei bad ban pyntreikam ïa ki lad jingïada kiba kham bha. Kane ka kynthup ban pyndait shuh ïa ki kor CCTV bad ban ai jinghikai ïa ki ‘Local Guide’ ha ryngkat ki kor ka juk stad teknoliji ba mynta.
Shuh shuh u la kyntu ïa kito ki ‘riew shimet bad ki lad pathai khubor kiba kynnoh ïa ka Sorkar Jylla bad ki pulit khlem ki sabut ba kin panmap namar ka jingkynthoh jong ki ha ka rukom kaba pynsniewdur ïa ka Meghalaya.
U la pyntip ruh ba ka nam jong ka Jylla kum ka jaka kaba juh bad ba biang tam na bynta ki nongjngohkai pyrthei ka dang sah, bad yn sa pyrshang ban pynbha shuh-shuh ïa ki lad ha ka liang ka jingshngaiñ.
“Ka Meghalaya ka dei ka jaka kaba shngaiñ, bad ngin pyntikna ba kan neh kumta. Ngin shim jinghikai na man la ki jingshem ba ngi mad bad ngin nang pynbha ïa ki lad jingïada jong ngi”, la ong u Myntri Rangbah.
