Shillong, Jylliew 09
U kpa jong ka Sonam Raghuvanshi, kaba la shah kem ha Ghazipur, Uttar Pradesh, hadien ba ka la pyndem ïalade halor ka jingkynnoh ba ka la saiñdur ïa ka jingpynïap ïa la u kurim ha Meghalaya, u la ong ba ka khun jong u, ka “thok” bad la shu kynnoh ïa ka ïa kaei kaba ka khlem leh.
Ki bahaïing jong ka, ki la dawa da ka jingtohkit Central Bureau of Investigation (CBI) halor kane ka jingjia.
“Ka Sonam ka thok. Kam don bynta eiei haba ïadei bad katei ka jingpynïap. Ka don hapdeng ka jingkyndit kaba jur. Ka long kaba lui-lui. Ka Sonam ka shah kynnoh ïa kaei kaba ka khlem leh. Ngi dawa ïa ka jingtohkit jong ka CBI,” la ong u kpa ha kawei na ki lad pathai khubor.
Ka kmie jong ka Sonam, ka Sangita, ka la pynpaw ïa ka jingsngewnguh, ba la lap ïa ka khun jong ka, ba ka dang im, hynrei ka kwah ban tip mano ba donkti ha ka ban pynïap ïa u pyrsa kurim jong ka, u Raja Raghuvanshi.
“Nga sngewnguh ba la lap ïa ka, hynrei ka jingsngewsih ka dang sah. Mynta, ngi kwah tang ban tip mano ba pynïap ïa u Raja. La lap ïa ka, hynrei ngi dang don hapdeng ka jingsngewsih kthang namar ka jingshah pynïap u Raja. Ka don ka jingsngewsih watla ka la wanphai, ngi la duh noh ïa u Raja. Ka jingtohkit kan pynpaw – mano ba leh aïu. Ki jingkynnoh ki la mih halor ka Sonam, bad ïa mynta, ngin hap mad ïa kine kiei-kiei baroh,” ka la ong.
Ka Sonam, ka kurim ‘ba la jah rngai’ jong utei u nongkhaïi ka Indore, uba la shah pynïap ha ka por ba ki leit ‘honeymoon’ ha Meghalaya, la lap hapdeng ka jingbym tip briew ha kawei ka ‘Dhaba’ ha Ghazipur. La ïalam noh ïa ka sha Ghazipur Medical College ban ïoh ïa ka jingsumar, ha kaba ka la pyndem noh ïalade hakhmat ki pulit, bad hadien kata la kem noh ïa ka.
Ki heh ophisar ki la ïathuh ba la kynnoh ba ka Sonam ka la saiñdur haba ïadei bad ka jingshah pynïap u lok jong ka da kaba siew da ki nongpynïap briew.
Ki pulit ki la kem ruh sa lai ngut kiba la shah kynnoh donkti ha ki jingkhynra ba shi-miet shi-miet. Katba ïa uwei u briew la lap ha Uttar Pradesh, ïa ki 2 ngut kiwei pat la kem na Indore. Ki nongshah kynnoh ki la ïathuh ha ki pulit ba ki la shah siew ha ka Sonam ban pynïap ïa u lok jong ka.
