Shillong, Jylliew 09
Uwei nongpeitkai u la khlad noh hadien ba u la hap na ka jaka shong ha ka jingïalehkai phainal jong ka Nations League hapdeng ka Portugal bad ka Spain ha Munich ha ka Lah Sngi U Blei, la pynthikna ki bor pynïaid ka UEFA.
Utei nongpeitkai u la hap na ka jaka shong ki lad pathai khubor kaba don kham hapoh. Na ka liang ki nongsumar bad ki pulit ki la leit sha katei ka jaka ban ïarap ïa une u briew. Hynrei u nongaiktien jong ka UEFA u la pynthikna ba uwei u nongkyrshan u la khlad noh hapdeng katei ka jingïalehkai.
Ki nongmihkhmat na baroh arliang mamla ki la pynpaw ïa ka jingsngewlem hadien katei ka jingjia hadien ba la kut ka jingïalehkai, ha kaba ka Portugal ka la jop lyngba ka tie-breaker da 5-3 kol ïa ka Spain.
U Coach ka Spain, Luis de la Fuente, u la pynpaw ïa ka jingsngewlem halor ka jingkhlad noh jong utei u nongkyrshan. “Nga kwah ban pynpaw ïa ka jingsngewlem kaba khraw namar ba uwei u nongkyrshan u la khlad noh. Ka pynkynmaw ïa ngi, ïa kaei kaba kongsan ha ka jingim.”
U nongmihkhmat jong ka Portugal u la pynpaw ïa kajuh ka jingpynbna sngewlem, da kaba ong ba ka jingïap ka la wanrah ïa u lyoh uba dum wat la ngi la lah ban ïoh jingjop hynne ka sngi.
U coach jong ka Portugal, Roberto Martinez, u la pynpaw ïa kitei ki jingsngew, da kaba ong ba ka dei ka khubor kaba sngewsih haduh katta-katta.
La antad ba utei u nongkyrshan u la hap na ka jingjrong kumba 8 meter eiei, hynrei ym shym la lah ban tip shai ha kano ka rukom u la hap.
