Shillong, Jylliew 09
U Symbud Myntri Rangbah ka Jylla bad uba dei khmih ruh ïa ka Tnad Urban Affairs, Bah Sniawbhalang Dhar haba kren sha ki lad pathai khubor ha ka 9 tarik u Jylliew 2025 ha ka ophis treikam jong u halor ka jingsah kem jong 4 ngut kiba la donkti ban pynïap ïa u Raja Raghuvanshi uba dei u nongwan jngoh kai na Indore, Madhya Pradesh sha ka Jylla Meghalaya, u la ong ba u la phah ïa ki Ophisar ka Jylla ban shim ïa ki sienjam katkum ka aiñ pyrshah ïa kine ki briew kiba donkti.
Ha kaba ïadei bad ka jingbuh ïa ki kor ringdur ne ki CCTV Camera hapoh Shillong bad ki jaka kiba marjan ban buh ka jingshngaiñ ïa ki paidbah, u Bah Sniawbhalang u la ong ba ka tnad ka la ïoh pdiang ïa ki jingkyrpad na kiba bun ki jaka ban buh noh ïa ki Close Circuit Television (CCTV) ban pynthikna ïa ka jingshngaiñ jong ki nongshong shnong ha Shillong bad ki bynta marjan.
U la ong ba ki don kumba 300 tam ki kor CCTV hapoh ka Integrated Command and Control Centre (ICCC) kiba buh hapoh bad sawdong sawkun jong ka nongbah Shillong bad ong ba na ka liang ka Tnad Urban ruh ka la pynkhreh ban dang buh shuh-shuh ïa ki kor CCTV ha kylleng ki jaka kum ha Jowai bad ha Tura.
Halor ka jingdon ki nongai wai Scooty kiba treikam be-aiñ, na ka liang u Bah Sniawbhalang u la ong ba na ka liang jong u, u la bthah ïa ki ophisar ba kin khmih tohkit bniah halor kane ka bynta bad ban pynthikna ba kino-kino kiba ai wai ki dei ban long kiba treikam da ka aiñ.
Na ka liang u Bah Dhar u la ai ka jingkhublei ruh ïa ki Tnad Pohïing ka Jylla halor ka jinglah jong ki ban lapksai ïa ki briew kiba donkti halor ka jingpynïap ïa u Raja Raghuvanshi kumjuh ïa ki trai shnong ka thaiñ kiba la kloi ban ai ka kti kamon ka kti kadiang ïa ki kynhun NDRF, SDRF, ka West Jaiñtia Hills Mounteering Club bad ki Tnad Pulit kiba la kloi ban pyndep ïa la ki kamram.
