Nongpoh, Jylliew 09
Ha kawei ka jingjia kaba la paw pyrthei lyngba ki dur khih CCTV, la ïohi ïa ki katto-katne ki nongwan jngohkai pyrthei na ka jylla Uttar Pradesh, kiba la shoh khawiang bad pynjot ïa ki jingdon jingem hapoh ka Thrills Fun Park, ha Mawlein Mawkhan, Ri Bhoi District bad wat ban ktah kti ruh ïa u trai jong katei ka jaka.
Katkum ka tyllong khubor ba la ïoh lum, la ïathuh ba katei ka jingjia ka dei kaba la jia ha ka sngi Saitjaiñ ba la dep, ka 7 tarik u Jylliew 2025 ha kaba la ong ba uwei na ki nongwan jngohkai u dei u heh shipai bad ba kane ka kynhun na UP ka la siew pisa ban rung bad jngoh ïa kawei ka kamra ba la tip kum ka ‘Haunted House’.
La ïathuh ba katei ka kynhun kaba la shoh khawiang, ka la pynpra ïa ki khlieh durbula kiba don hapoh katei ka kamra bad ynda haba u trai u la pyrshang ban pynsangeh, kitei ki nongwan jngohkai ki la sdang sa ban ktah kti ïa u ryngkat ka jingkren khlem akor bad hadien ka jingwan ïarap jong ki nongtrei kitei ki briew pat ki sdang ban kynran dien noh.
La kynnoh ruh ba uwei na kitei ki nongwan jngohkai, uba la ksih ïa u trai katei ka jaka, u la byrngem ba un pynïap ïa u trai kane ka Thrills Fun Park lada kane ka jingjia ka dei ha ka shnong ka jong u, ha jylla Uttar Pradesh.
Shuh shuh la ïathuh ba na ka liang u trai kane ka jaka, um kwah satia ban pynheh ïa kane ka jingjia, khamtam hadien jong ka jingjia shah pynïap u Raja Raghuvanshi kaba ktah shikatdei ïa ka kam jngohkai pyrthei ha ka thaiñ Sohra bad ka jylla hi baroh na ki jingshah kynthoh kiba har rukom.
