Shillong, Jylliew 09
U Cristiano Ronaldo u la ai ksai ba un shongthait noh na ka kam ïalehkai hadien ba ka Portugal ka la rah ïa ka nam lahduh ha ka UEFA Nations League.
Une u rangïalehkai, 40 snem ka rta um lah khlem da jaw ummat da ka jingkmen hadien ba ka Portugal ka la lah ban pynliem noh ïa ka Spain lyngba ka tie-breaker da 5-3 kol ha ka jingïakhun final kaba la long ha ka shiteng synñia jong ka 9 tarik u Jylliew 2025 ha Allianz Arena kaba ha Munich, Germany. Une u rangïalehkai u la lah ban thep kol na ka bynta ban ïarap ïa ka Portugal ban ïakhaid mar 2-2 kol pyrshah ïa ka Spain.
Hadien u Ronaldo u la hap ban peitkai ïa ki paralok jong u kiba la lah ban pynurlong ïa ka jingjop ha ka tie-breaker da 5-3 kol. Naduh ka jingïakhun ba khatduh jong ka FIFA World Cup 2022 ha Qatar, ki nongkyrshan ki la ïathuh lypa ba u Ronaldo u dangsah sa kawei pat ka jingïakhun World Cup. Ha ka por ba ka lympung ka ban bud, u Ronaldo un sa kynjoh 41 snem ka rta.
Hadien ka jingjop ha ka UEFA Nations League, utei u khlur ïalehkai jong ka Portugal u la ai ksai ba un shongthait noh, da kaba ong ba u dang kwah ban bteng lada u lait na ki jingmynsaw kiba jur.
“Phi tip katno snem nga la don mynta. Ka paw shai ba nga la jan sha kaba kut ban ïa kaba nga la long ha kaba sdang, hynrei nga hap ban lehkmen ha man la ka khyllipmat. Lada ngam mynsaw jur, ngan ïai bteng ha kam ïalehkai,” la ong u Ronaldo ha ki lad pathai khubor hadien ka jingjop.
