Shillong, Jylliew 09
Hadien ka jingshah kem noh jong ka Sonam Raghuvanshi, 30 snem ka rta, ha ki pulit jong ka Ghazipur jong ka jylla Uttar Pradesh, ki pulit ka Meghalaya kiba la hiar sha katei ka jylla, kin sa wallam biang ïa ka sha Meghalaya ban pynïaid shakhmat ïa ka jingtohkit.
Ka jingshah kem jong ka Sonam ka la long hadien ba la suba jur ba ka dei kaba la lamkhmat ha ka ban pynïap ïa la u kurim u Raja Raghuvanshi ha ka jingwankai shikurim (Honeymoon) sha Meghalaya.
La lap ïa ka Sonam, ha kawei ka jaka bam, ha ka por ba ka la leit ban pyntip sha la ki bahaïing bahasem bad hadien kane ka la shah kem noh. Hadien ka jingshah kem, la ïalam ïa ka Sonam ban shah khmih ha kaba ïadei bad ka koit ka khiah jong ka ha ka hospital ha Ghazipur.
Na ka liang jong ki pulit ka Meghalaya ha ka miet Lah Sngi U Blei ki la ïalam noh ïa ka sha Patna da ka kali bad lashai yn sa wallam ïa ka sha Shillong, ha kaba yn sa ïalam ïa ka hakhmat jong ka ïingbishar District Shillong Court.
Katkum ka jingïathuh ki pulit, ka Sonam ka la shu wai ïa ki 3 ngut ki nongpynïap briew ban pynïap ïa la u kurim u Raja Raghuvanshi, namar ba ka la don ïa ka jingïadei bad jingieid bad u Raj Kushwaha.
