Shillong, Jylliew 09
U President ka Federation of Khasi Jaiñtia and Garo People (FKJGP), Bah Dundee C Khongsit haba kren sha ki lad pathai khubor ha ka Lah Sngi U Blei, ka 09 tarik u Jylliew 2025, u la ïathuh ba ka seng ka sngap jar ha kine ki sngi halor ka jingshah pynïap jong u Raja Raghuvanshi bad ka jingjah rngai jong ka Sonam Raghuvanshi.
U la ong ba ka seng ka sngap jar, namar ki kwah ban peit ïa ka jingtohkit jong ki pulit ka jylla Meghalaya halor kane ka jingjia. Hynrei mynta ngi la ïohi ba ka Sonam Raghuvanshi ka dei kaba don kti lang ban pynïap ïa la u lok u Raja Raghuvanshi.
U Bah Dundee u la ong ba shibun ki briew ki la kynthoh ïa ka jylla jong ngi, ba ka dei ka Jylla kaba don bynta ha ka kam khaïi ïa kita ki dkhot met jong ki briew bad ka jingshah pynrem ba ngi dei ki briew kiba long riewkhlaw kaba la wanrah ka jingsngewsih ïa ka Jylla baroh kawei bad ban pyndap ram, hynrei ka khubor ba la ïoh hynne ka step pat ka la long da khongpong.
“Ngim dei ki jaitbynriew kiba thrang snam ban shu pynïap ïa kiba lui-lui kiba wan kai sha kane ka Jylla jong ngi, hynrei mynta ka jingshisha ka paw ba ki briew jong ngi ki dei kiba ieid bad burom,” ong u Bah Dundee.
Ka seng ka la ai khublei kyrpang ïa ki pulit ka jylla kiba la trei shitom borbah ban kem ïa kiba don kti ban pynïap ïa u Raja Raghuvanshi uba dei kum ki nongwan jngohkai sha ka jylla jong ngi, ha kajuh ka por ruh ki pulit ki la ïoh ban kem ïa ka kurim u Raja ka Sonam Raghuvanshi bad ban dawa pynshitom ïa ka katkum ka ain. Na ka liang ka seng ka la phah ruh ka kyrwoh sha ka Sorkar Jylla ba ka dei ban shim khia mardor ïa kane ka kam, ba kumno ba ka lah ban pyntreikam noh ïa ka aiñ kaba na ka Jylla ka lah don lypa kum kata ka MRSSA 2016, ïa kaba yn lah ban tehlakam ïa kum kine ki jingjia kiba sniew ban wan jia hapoh ka jylla jong ngi, katba ngi dang ap ïa kata ka jingbit na ka sorkar pdeng ba ngin ïoh ban treikam ïa ka ILP hapoh ka Jylla, ong u Bah Dundee.
Shuh shuh, u la ong kumba long mynta hi na ka por sha ka por ki kam bymman bad ki kam sniew kiba jia ha ka jylla jong ngi hi, la ka long ki kam tuh, ki kam lute bad kiwei kiwei de ki kam sniew bunsien ki dei beit ki briew kiba nabar kiba leh ïa kine ki kam bad ka long ka jingbym shong shngaiñ ïa ngi kum ka jaitbynriew ha ka jylla la jong ruh lada ngim don ka aiñ ban tehlakam ïa ki briew kiba rung kiba mih ha ka jylla.
