New Delhi, Jylliew:
Ka tnat shipai jong ka Israel ha kane ka por, ka la pyntikna ba u Assad Abu Sharia, uba long u nong-ialam jong ka kynhun Mujahideen Brigades, ka kynhun lehnoh barit- kaba don jingiadei bad ka Hamas na Gaza, u la kyllon iap hapdeng ka jingleit khynra jong ki shipai Israel ha nongbah Gaza.
Kumjuh, sa uwei pat u nongialam jong kawei pat ka kynhun lehnoh ba don jingiadei hi bad ka Hamas, u Mahmoud Kaheel, la ong ba une u nongialam ruh u la dep iap hapdeng ka jingleit hiar thma jong ki shipai Israel sha kawei pat ka bynta jong ka nongbah Gaza.
Nalor nangta, ka Mujahideen Brigades ka la pyntikna halor ka jing-iap jong u Abu Sharia bad u Kaheel ha ki jingleit thombor jong ka Israel, ha kaba ki nongthoh khubor ka Palestine ki la pyntip ba ki don palat 30 ngut kiba khlad na ki jingleit thombor ka Israel sha Sabra bad ha kylleng sawdong ba marjan bad katei ka thaiñ.
La ong ba u Kaheel, ka kurim bad ki khun jong u ryngkat ki bahaiing- bahasem jong u, ki la khlad lang baroh ha katei ka jingleit khynra jong ka Israel ha kine ki khyndiat sngi ba la leit.
