Jowai, Jylliew 09
Ka Kiang Nangbah HSS, ka Ummulong Presbyterian HSS, H.K Singh Memorial Secondary School, North Liberty HSS Jowai, bad St. Dominic HSS ki la jam sha ka semi-final ha ka lympung ïalehkai ‘District Level Inter School Subroto Mukherjee Cup Football Tournament 2025’ ba la pynïaid da ka shlem treikam u District Sports Officer (DSO), West Jaiñtia Hills District.
Ha ka jingïakhun quarter final Under-17 ki kynthei kaba la long ha ka Lah Sngi U Blei ha madan Kiang Nangbah Stadium kaba ha Ladthadlaboh Jowai, ka Kiang Nangbah ka la pynliem da 3-0 kol ïa ka Krist Syiem Secondary School. Kumjuh ka Ummulong Presbyterian ka la jop lyngba ka tie-breaker da 2-1 kol ïa ka Police Public SS. Ka H.K Singh Memorial SS ka la jop da 2-0 kol pyrshah ïa ka St. Dominic HSS. Katba ka North Liberty ka la khyrwit haduh 6-0 kol pyrshah ïa ka Jaiñtia HSS.
Ha ka jingïakhun jong ka Under-15 ki shynrang, ka St. Dominic HSS ka la pynliem noh ïa ka Marian Hill HSS da 1-0 kol.
Te, ka jingïakhun quarter final kan bteng biang ha ka Sngi Ba-ar ha Kiang Nangbah Stadium ha kaba lai tylli kin dei ha ka Under-15 (Boys) bad ar tylli ha ka Under-17 (Boys).
