Florida, Jylliew:
Uwei u rangbah na Florida u la shah rai set patok baroh shi jingim hadien ba ki pulit ki la suba don kti halor ka jingpyniap beiñ ia i khun kynthei jong ka samla barim jong u ba dang 2 snem ka rta.
U Travis Ray Thompson, 27 snem ka rta, u la shah pynngat ha ki kyndon pynkheiñ aiñ jong ka jingpyn-iap briew hadien ba u la pynshitom dusmon ia itei khyllung rit ba la tip kyrteng Jacklyn Schwingel ha ka 2 tarik u Jymmang 2022 haduh ba u shyieng budlum u la kheiñ bad ki nongpeit bniah ki iathuh ba i la mynsaw jur shapoh jong ka met.
Ka kmie jong itei khynnah rit ka la iehnoh ha ka jingsumar jong u Thompson ha katei ka step ban leit trei, tang shi taiew hadien ba la pynkut noh ia ka jingiadei hapdeng jong ka bad u. Kumba 25 minit hadien ba ka la leit noh, u Thompson u la phone ban ong ba itei khyllung i la ur bad mynsaw jur, ha kaba katei ka kmie ynda ka la wan phai sha iing, ka la shem ba itei khyllung im lah ring mynsiem shuh hynrei u klongsnam ruh u la shu tied tang malu-mala.
Kitei ar ngut ki la pynkit mar mar ïa itei khyllung sha ka hospital ha Tavares, kaba don hapoh ka nongbah Florida, ha kaba la pynbna ba i la khlad noh tang hadien katto-katne por ba la pynpoi ha katei ka jaka sumar. Ka tnat jong ki kam runar ‘Crime Branch’ jong u nongsynshar katei ka nongbah Marion ka la sdang ïa ka jingtohkit khlem da pynslem shuh haba iadei bad ka jingmynsaw jur bad jingkhlad jong itei khyllung rit bad na ka liang jong ki nongpeit bniah bad ki doktor, ki la pynpaw ba dei u Thompson hi uba ri bad sumar ia itei khyllung uba la shoh bad tied beiñ ia itei khyllung ba dang 2 snem ka rta na ki bynta nadien jong ka met haduh ba u shyieng budlum u la kheiñ bad mynsaw jur haduh katta katta.
Hynrei la ong ba u Thompson, u la pynksan ba u don ha kawei ka kamra jong ka iingsah jong u, ha kaba u la iohsngew ia ka jingsawa kaba jur bad u lap ba ka Jacklyn kam shym la lynñiar eiei, hynrei u la kyntait ban batai shaphang kaei kaba la jia bad ba um tip kumno itei khyllung i la mynsaw haduh katei, wat la u dei tang ma u uba la heh- la san uba don lang bad ka ha ka por ba katei ka jingjia ka la jia.
Hadien ka jingbishar bniah jong ka tnat tohkit kumba 2 kynta eiei, la lap ba dei utei hi u rangbah uba long u runar bad u nongleh ia katei ka kam pyniap briew bad ka nongbishar Barbara Kissner ka la rai pynrem ia u Thompson da kaba set patok syndon ia u baroh shi jingim.
U heh jong ka nongbah Marion, u Billy Woods, u la iaroh ia ki heh ka tnat tohkit ba iadei bad ki kam runar kiba heh, namar ka jingaiti lut jong ki, ha kaba, ki la lah ban pynioh bad pynthikna ia ka hok jong ki nongshah leh kam sniew na ka por sha ka por.
