Shillong, Jylliew 10
Ka kynhun ïalehkai phutbol ka ri India ka la mad ïa ka jingshah rem noh ha ka Hong Kong da 1-0 kol ha ka lympung ïalehkai AFC Asian Cup Qualifiers ha ka Sngi Ba-ar ha Kai Tak Stadium kaba ha Kowloon, Hong Kong.
U coach ka India, Manolo Marquez u la kylliang haduh lai ngut ki rangïalehkai kiba don bynta ha ka jingïalehkai paralok dangshen pyrshah ïa ka Thailand. U Suresh Singh Wangjam u la mihpli ha ka jaka u Ayush Dev Chhetri ha ka bynta kaba shapdeng, kumjuh u Bran-don Fernandes bad u Lallianzuala Chhangte kiba la mih bujli ha ka jaka u Sunil Chhetri bad u Manvir Singh, katba u Ashique Kuruniyan u la shim ïa ka bynta kaba shakhmat.
Naba baroh ar tylli ki kynhun kim shym la ïoh wat tang shi point, kumta ki donkam ban ïoh jingjop ha kane ka jingïakhun. Wat la baroh ar tylli ki kynhun ki la ïakhun tyngeh bad ki la ïoh ïa ki kabu kiba biang hynrei kim shym la lah ban thep kol.
Ha ka minit kaba 25, u rangïalehkai ka Hong Kong u Raphael Lee u la tynjuh bor bad u rangapkol ka India u Vishal Kaith da kaba shut na jngai, hynrei une u nongapkol ka India u la ïeng skhem ban pyllait na ka jingshah thep. Kumjuh u rangïalehkai ka India u Liston Colaco u la ïoh ïa ka kabu kaba biang ban shut, hynrei um shym la lah ban pynurlong bad u rangapkol ka liang pyrshah u la ïoh da kaba suk ban kem ïa ka bol.
U Anwar Ali u la ïakhun tyngeh ban ïoh thep kol, hynrei u la shah khanglad noh ha ki rangïalehkai ka Hong Kong. Lymda u la lah ban thep kol kan wanrah ka jingkylla ïa ka rukom ïalehkai ka India ha kane ka jingïakhun.
Ka kabu kaba biang eh na ka bynta ka India ka la wan ha ka minit kaba 35 ha kaba u Brandon Fernandes u la ïoh ban rong ïa ka bol bad u la ïarap ban pynbuh bol na ka bynta u Liston Colaco, uba la ïoh ban shut najngai, hynrei um shym la lah ban pynurlong.
Ka Hong Kong ka la nangjan ban ïoh thep kol ha kaba u Juninho u la pyrshang ban shut lyngba ka free kick, hynrei u rangapkol ka India u la lah ban khanglad na kane ka jingshah thep. Haduh kaba kut jong ka kylla step kine ki kynhun kim shym la lah ban thep kol.
San minit hadien ba la bteng biang ïa ka jingïa-khun jong ka kylla miet, u Ashique u la ïoh biang ïa ka kabu ksiar, hynrei ka bol kaba u la shut ka la her shabar diengkol. Na ka daw ka jingbym lah ban thep kol, ha ka minit kaba 57 u Ashique u la shah bujli noh da u Sunil Chhetri, katba u Naorem Mahesh Singh u la mih madan ha ka jaka u Brandon Fernandes.
Hadien katto katne minit, u Wangjam u la duh ei ïa ka kabu ksiar hadien ba u la shah khanglad noh ha u rangapkol ka India u Vishal Kaith.
Ha ka minit kaba 80, u Mahesh bad u Chhetri ki la ïakyrshan lang ha kane ka jingïakhun bad hadien ka bol ka la poi sha u Liston Colaco, hynrei um shym la lah ban thep. Hadien katto katne por, u Lallianzuala Chhangte u la ïarap pynbuh bol na ka bynta u Chhetri, hynrei u la la shah khanglad noh ha u Leon Jones.
Hashwa ban wai artad, ka Hong Kong ka la ïoh ïa ka kabu kaba biang ban pynkhih jar lyngba ka penalty ba la shut da u Stefan Figueiredo Pereira ha kaba u rangapkol ka India u Vishal Kaith um shym la lah ban khanglad na ka jingshah thep. Kane ka shi kol ka la pynskhem ïa ka Hong Kong ban ïoh jingjop ha kane ka jingïakhun.
Lyngba kane ka jingjop ka Kong Kong ka la ïaryngkar mar 4 point bad ka Singapore, kaba don ha ka kyrdan ba hakhlieh ha ka Group-C, katba ka India ka dang sah 1 point ryngkat bad ka Bangladesh.
Te, ka India kan pyn-khreh ïa ka jingleit ïakhun pyrshah ïa ka Singapore ha ka 9 tarik u Risaw mynta u snem.
