Shillong, Jylliew 10
U Myntri Sorkar, Bah Paul Lyngdoh uba dei ruh u Nongaiktien ka Sorkar, u la pynpaw ba ka long kaba donkam na ka bynta ka Meghalaya ban pynkhlaiñ ïa ki lad jingïada katba dang ap ïa ka Sorkar Pdeng ba kan pyntreikam ïa ka Inner Line Permit (ILP) bad kumba ka paw imat ka lah ban nang shim por.
Haba ïakren bad ki nongthoh khubor ha ka Sngi Ba-ar, u Bah Paul u la ong, ka ILP ka dei ka mat jingdawa kaba dang ïai bteng haduh mynta bad ka dei ruh kawei ka mat kaba kongsan kaba la dep ban mynjur ruh da ka ïingdorbar thawaiñ ka Jylla.
“Kumba ka long mynta, ngi sngewthuh ban ap ïa ka jingmynjur jong ka Sorkar Pdeng ban pyntreikam ïa ka ILP, imat ka lah ban dang shim por, kumta ngi donkam ban pynkhlaiñ ïa ki lad jingïada namar,” la ong u Bah Paul bad bynrap ba ka la shim por shibun na ka liang ka Sorkar Pdeng ban mynjur ïa ka ILP.
Haba pynpaw ba ka Sorkar kan sa nang pynkhlaiñ bad pynthymmai ïa ka Standard Operating Procedure (SOP) na ka bynta ka jingïada bad ka jingshngaiñ ki nongshong shnong bad ki nongwankai sha Jylla, u Bah Paul u la ong, “Ngi don ruh ïa ka Meghalaya Residents, Safety and Security Act (MRSSA), kaba donkam ban hap pynkhlaiñ”.
Lah ban kdew hangne hadien ka jingjia ha Sohra, kata ka jingshah pynïap jong u Raja Raghuvanshi ba la kynnoh ba ka dei ka kurim jong u, ka Sonam Raghuvanshi, ka jingdawa ïa ka ILP ka la nang jur ha ka Jylla bad khamtam lei hadien ka jingseisoh ka jingtohkit ban sei ïa ki jingshisha halor ka jingshah pynïap jong utei u nong Indore uba wan ‘honeymoon’ sha Sohra.
