Guwahati, Jylliew:
U Myntri Rangbah ka Assam u Himanta Biswa Sarma hynnin ka sngi u la ong ba ki la don kumba 330 ngut ki briew kiba wan rung be-aiñ ki la shah beh noh kum shi bynta jong ka jingpyntreikam kaba thymmai.
Ïa kine ki jingshah beh shnong la leh katkum ka aiñ Immigrants Expulsion from Assam Act, 1950. Kane ka long hadien ka rai jong ka Supreme Court ha u snem 2024 kaba la buh ïa u snem 1971 kum u snem ba la buh ban long nongshong shnong ha Assam. Katei ka rai ka ailad ruh ïa ka jylla ban shimkhia khlem da ïaid lyngba ka Foreigners Tribunal.
“Ka ïingbishar ka la pynthikna ba ka aiñ jong ka snem 1950 ka dang treikam haduh mynta. Ki District Commissioner mynta ki lah ban weng ïa kino kino kiba suba ba ki dei ki bar jylla”, la ong u Sarma hapoh ka ïing dorbar.
Haba shah kylli jingkylli na u nongïalam ka liang pyrshah, u Debabrata Saikia, u Sarma u la ong ba na kitei ki 330 ngut kiba la shah beh kim shym la wanphai satia uwei ruh. Don kiba la phah biang wat la ki don ki mukotduma ha ka ïingbishar, hynrei hadien la wanrah biang katkum ka jingbthah jong ka ïingbishar.
U Sarma u la batai ruh balei ba ki slip kyntait jong ka NRC ki slem. U la ong ba ka hukum jong ka Supreme Court jong u snem 2019 ka dawa ba dei ban pynthikna shwa ïa ki jingtip jong ka NRC. Ka kynhun jong ka sorkar pdeng mynta ka dang trei ïa kane, bad dei ban leh hapoh 8 haduh 12 bnai.
U la pynpaw ïa ka jingsngewkhia halor ki jingbakla ha ka NRC kaba mynta, kum ki kyrteng thok bad ki jingpynkylla. Ka sorkar ka la pan ban peit bniah biang-20% ki kyrteng ha ki jaka khappud bad 10% ha kiwei pat ki jaka. Wat ka All Assam Students’ Union ruh ka la khot ban pynthymmai ïa ka NRC.
U Sarma u la ong ruh ba ka jingshah pynrung kyrteng ha ka NRC kam khanglad ïa uno uno ban shah pynbna kum u bar jylla da ka Tribunal. “Lada u Deputy Commissioner u ngeit ba uno uno u dei u bar jylla, lah ban beh noh ïa ki khlem da leit sha ka Tribunal,” u la bynrap.
