Gaza City, Jylliew:
Ka United Nations ha ka Lah Sngi U Blei ka la ong ba ka la lah ban pynpoi tang khyndiat eh u ata sha Gaza naduh ba ka Israel ka la weng noh ban khang ia ki lad jingïarap naduh kine lai taiew ba la leit namar bunsien hi ia kitei ki marbam ba dang pynpoi, la lute noh da ki runar kiba don ia ki tiar ïakhun bad don ruh ba kitei ki marbam ki la shah ha ki paidbah nong Palestine hi kiba la mad ia ka jingkyrduh bam.
Kane ka kynhun ka la kit 4,600 Metric Ton u kew tylliat sha Gaza lyngba ka jingkieng Kerem Shalom, kaba long tang katei hi ka jaka rung ba ka Israel ka la ailad ia ki tnat sam jingïarap ban pyndonkam ha ka ban pynpoi ia ki mar bam shapoh ka nongbah Gaza.
U Haq u la ong ba ki kynhun ai jingiarap ha Gaza ki antad ba ka dang donkam sa kumba 8,000 haduh 10,000 Metrik Ton u kew tylliat bad ata ban pynpoi sha kawei pa kawei ka longïing ha Gaza shi byrni shini bad ban tehlakam ia ka jingkyrduh bam bad ka jingiap thngan jong ki paidbah nongshong shnong kiba la shu im satar hapdeng ka jingma jong ka thma naduh ba ka Hamas ka la leit thombor ia ka Israel ha ka 7 tarik u Risaw jong u snem 2023.
Katkum ki jingbthah jong ka World Food Programme, ka 4,600 Metric Ton u kew tylliat lane u ata, kin lah ban dap ia kumba 8 sngi na ka bynta ki 2 million ngut ki nongshong shnong jong ka Gaza, kaba pynshong nongrim ha ka rukom bam shi sngi kaba long 300 gram na ka bynta uwei u briew.
Kumta u Haq u la kyntu ruh ia ka Israel ba kan ailad ban nang pynpoi shuh- shuh ia ki lad jingiarap bad ki mar-bam kiba long ka jingdonkam ba kongsan eh naka bynta ki paidbah ba lui-lui kiba don hapoh Gaza Strip.
Ka U.N. ka la pynpoi kham bun ïa utei u kew tylliat ryngkat bad ki tiar sumar bad ki tiar bam kiba katei ka nongbah ka la kyrduh bad shong tyrkhong naduh ba ka Israel ka la weng noh ïa ka jingkhang dam kaba 11 taiew ha ka shiteng jong u bnai Jymmang. Ki riew shemphang ki la maham ruh ba ka Gaza ka don hapdeng ka jingma jong ka jingkyrduh bam ba shyrkhei, ha kaba ka jingdon jong ki khynnah rit kiba mad ia ka jingkyrduh bam ka la jur haduh lai shah.
Ka Israel bad ka America ki kwah ba ka U.N. kan trei lyngba ka jingïarap thymmai jong ka Gaza kaba la pynmih jingïakynad, hynrei ka U.N. ka la kyntait, da kaba buh jingkylli ïa ka jinglong pdeng jong ka bad ka kynnoh ïa ka rukom sam ïa ki jingïarap ba ka long kaba pynlong shipai bad pynbor ïa ki briew ban pynkynriah jaka.
Ka Israel bad ka America ki la kynnoh ba ka Hamas ka la tuh ïa ki jingïarap na ki kam ba la ïalam da ka U.N., kaba ki lehnoh ki kyntait.
Ka GHF ka pyndonkam ia ki kompeni shimet jong ka U.S. kiba peit ia ka jingpahara bad jingpynpoi mar ban treikam. Ka la sdang treikam ha Gaza ha ka 26 tarik u Naitung bad ka la ong ha ka sngi Nyngkong haduh mynta ka la ai 11.4 million tylli ki jingbam.
Ka Israel ka pynlong ia ka U.N. ban pynhap ia ka jingiarap ha ka liang jong ka Palestine ha ka jingkieng Kerem Shalom, ha kaba hadien kata la hap ban shim ia ka da ka U.N. bad ki kynhun ai jingiarap kiba la don lypa ha Gaza. Ka U.N. ka la kynnoh ia ka Israel ba ka ju kyntait ia ki jingkyrpad ban ioh rung.
