Shillong, Jylliew 10
Ka Dkhiah Presbyterian H.S.S, Lotus S.S, Khliehriat H.S.S bad ka Sanshnong S.S ki la lah ban pynthikna ban jam sha ka semi final ha ka Under-17 ki kynthei jong ka District Level Inter School Subroto Cup Football Tournament 2025 ba la pynïaid da ka shlem treikam jong ka District Sports Officer (DSO) East Jaiñtia Hills.
Ha ka jingïakhun quarter final U-17 ki kynthei kaba la long ha ka Sngi Ba-ar ha madan Deinchynrum kaba ha Khliehriat, ka Khliehriat ka la pynliem noh ïa ka Little Star SS lyngba ka tie-breaker da 4-3 kol hadien ba kine ki kynhun kim shym la lah ban thep kol.
Kumjuh, ka Sanshnong SS ka la jop da 1-0 kol ïa ka Khliehriat Presbyterian. Ka Dkhiah Presbyterian ka la pynliem noh ïa ka Ïawpynkat UPS lyngba ka tie-breaker da 5-3 kol hadien ba kine kynhun kim shym la lah ban thep kol.
Ha kawei pat ka jingïakhun, ka Lotus SS ka la pynliem noh ïa ka Wapung HSS da 2-0 kol.
Haba phai sha ki jingïakhun quarter final Under-17 ki shynrang, ka Little Star SS ka la pynliem noh ïa ka Sanshnong SS lyngba ka tie-breaker da 4-2 kol bad ka Wapung HSS ka la pynjem khnap ïa ka Dkhiah Presbyterian haduh 6-0 kol.
Lyngba kine ki nam jop, ka Little Star bad ka Wapung ki la jam sha ka semi final.
Kiwei pat ki jingïakhun quarter final jong kane ka kyrdan kin bteng biang ha ka Sngi Balang ha kaba ka Khliehriat H.S.S kan ïakhun pyrshah ïa ka K.B Memorial S.S ha ka por 12 baje, katba ka Musniang S.S ïa ka Seiñ Raij Tuber H.S.S ha ka por 1:30 nohphai sngi.
Ki jingïakhun Under-15 ki shynrang kin long ha ka Sngi Balang hapdeng ka Musniang S.S pyrshah ïa ka Rymbai Govt S.S ha ka por 9 baje mynstep, katba ka K.B Memorial S.S ïa ka Wapung H.S.S ha ka por 10:30 mynstep.
Katba ki jingïakhun semi final U-17 ki kynthei kin long ha ka Sngi Palei hapdeng ka Dkhiah Presbyterian H.S.S pyrshah ïa ka Lotus S.S ha ka por 9 baje mynstep, katba ka Khliehriat H.S.S ïa ka Sanshnong S.S ha ka por 10:30 mynstep.
