Shillong, Jylliew 10 (UNI)
U Myntri Sorkar Pdeng ka tnad Ports, Shipping & Waterways, u Sarbananda Sonowal ha ka Sngi Ba-ar u la ong ba ka jingroi kaba la lam lynti da ki kam jngohkai pyrthei ki long kum ka bynta ba kongsan jong ka roi ka par ka Meghalaya.
“Ka jingkiew ha ki kam jngohkai pyrthei ha Meghalaya ka dei ka dak ba bha namarba ka Meghalaya ka la kylla long ka jaka na bynta kiba bun ki nongjngohkai pyrthei kiba napoh ri bad shabar ri ruh kiba wan jngohkai sha India,” la ong u Sonowal.
Haba kdew ba ka Meghalaya ka dei ka jaka ba la ai sngewbha da ka mei mariang, u Myntri u la ong, “Ngi dei ban rakhe ïa ka da ka jingkyrmen skhem kaba khraw bad ban pyntikna ïa ka roi ka par kaba neh lyngba ka jingpyndonkam ïa ki lad ki lynti kiba khraw ha ka liang ki kam jngohkai pyrthei.”
U Sonowal u la pyntip ruh ba ka Sorkar hapoh ka jingïalam u Modi ka la mang T. 244 klur hapoh ka Swadesh Darshan ban kyntiew ïa ki kam jngohkai pyrthei kaba neh ha ka Jylla.
U la ong ruh ba ka Sorkar Pdeng ka la thaw ïa ki lad ki lynti ha ki jaka ba pawnam kum ka pung Umïam, Lum Sohpetbneng, Krang Suri Falls, ki krem Siju, bad ka Nokrek Reserve kiba dang don hapdeng ka jingpynkylla sha ki jaka jngohkai kiba pawnam bad kiba khring ha ka pyrthei.
Naduh ki lynti ïaid jong ki kshaid haduh ka Meghalaya Age Cave Experience, u la ong ba ka jingpynleit jingmut ha ki kam jngohkai pyrthei kiba neh bad kiba ngam jylliew ka la pynim biang ïa ka ïoh ka kot jong ka thaiñ bad thaw ïa ki lad kamai jakpoh.
“Ki jaka ba kynja mynsiem bad ki jaka sah kynmaw pateng kum ka shnong Nartiang bad Mawphlang ruh la kyntiew hapoh ki kyrdan jngohkai pyrthei ba kyrpang, kaba buh ïa ka Meghalaya kum ka jaka jngohkai pyrthei kaba im hapoh ka Thaiñ Shatei Lam Mihngi ka ri India,” la ong u Sonowal.
Halor ka jingïarap pisa jong ka Sorkar Pdeng sha ka Meghalaya, u Myntri u la ong, ka Meghalaya, kaba la kyrshan da ka jingkiew kaba 105% ha ka ‘Central Grant-in-Aid’, ka la sakhi ïa ka jingkiew kaba khraw ha ki jingtei & ka imlang-sahlang.
U la ong ba ki jingthmu ba kongsan ki kynthup ïa ka ‘Greenfield High-Speed Corridor’ hapdeng ka Mawlyngkhung & Panchgram kaba T. 22,864 klur, kaba la buh ban pynbha shi kat dei ïa ka jingpynïasoh ha ka thaiñ.
“Palat 540 km ki surokbah jong ka National Highway la dep shna, bad ki projek pynïaid sor ha New Shillong bad Tura la pyntreikam hapoh ka PM-DevINE,” ong u Sonowal.
Halor ki jingïarap na bynta ka bha ka miat kum ki ‘Post-metric Scholarship’ na bynta palat 76,000 ngut ki samla pule SC/ST/OBC, la pyllait T.2,331 klur hapoh ka ‘MUDRA Loan’, bad ka jingkiew ba lai shah ha ka jingai pisa jong ka National Health Mission (NHM) ka la ai bor ïa ki jaidbynriew ha kylleng ka Meghalaya.
