Shillong, Jylliew 10
U Bah Titosstarwell Chyne, MDC jong ka Sohra Konstitwensi, u la dawa ba kito ki paradoh parasnam kiba kynthoh ba ka thaiñ Sohra ka bun ki menshohnoh, ki dei ban panmap hapoh ka 24 kynta, lym kumta un ujor beit da ka ejahar (FIR).
“Ka jingshah pynthohbria jong ka thaiñ Sohra, kam dei tang ha ki National Media ne na ki briew kiba nabar ka jylla hynrei wat ki paradoh parasnam, kiba pynkynmaw ha ki rynsan social media da kaba ong ba ka thaiñ Sohra kaba bun menshohnoh, don ruh kiba ong kumno u menshohnoh u bam sa ïa u dkhar ruh. Kane ka long kaei-kaei kaba ktah ïa ka jingsngew jong nga bad jong ngi lang baroh ban ong ba ka thaiñ Sohra ka dei ba bun menshohnoh,” la ong u Bah Titos.
Une u MDC ka Sohra u la kren bad kyntien ha ka jingïalang paidbah ba la pynlong ha ka Sngi Ba-ar ha Saitsohpen, Sohra kum ka dak ban pynpaw ïa ka jingpyrshah halor ka jingshah thad bad shah pynthohbria ka jylla Meghalaya bad khamtham lei jong ka thaiñ Sohra bad ruh ban pynpaw ka jingsngewlem halor ka jingshah pynïap noh jong u Raja Raghuvanshi.
U Bah Titos u la ong, ki khubor na rithor kiba pynthohbria ïa ka Sohra khlem da tip ïa ka jingshisha ka la pynbitar ïa ki nongshong shnong ka jylla bad ïa ka thaiñ Sohra.
Ha kaba ïadei bad kane ka jingkynthoh ha ki rynsan social media, u Bah Titos u la ong, “Ym dei tang ki briew ba nabar hynrei wat ki briew jong ngi ki don kiba kynthoh pynsngewsih ïa ka thaiñ Sohra da kaba kynnoh ba ka thaiñ Sohra ka dei kaba bun ki menshohnoh.”
“Lada la dawa ïa kiwei ban panmap halor ka jingpynthohbria, dei ruh ban dawa na kito ki paradoh parasnam kiba la kynthoh ba ki dei ban panmap hapoh ka 24 kynta, lym kumta ngin ujor da ka ejahar (FIR) namar ngi la tip ïa ka kyrteng jong ki,” la ong u Bah Titos.
U la ong ba kane ka jingïalang kan dei ka khubor ym tang ïa ki nong India ne ïa ki briew nabar jylla hynrei kan dei ruh ka khubor ïa ki paradoh parasnam na kiwei ki thaiñ kiba la pynthohbria ïa ka thaiñ Sohra.
Ha kawei pat ka liang, u Bah Titos u la ong, na ka liang ki National Media, ki la ai ka jingpanmap hynrei kam pat biang satia namar ym pat ïohi ba ka khlem ong kyrpang ïa ki nong Sohra. “Ngi dawa jingpanmap paidbah ban kren thik ïa ki nong Sohra, namar la kynnoh laiphew jait, donkam ka jingpynshai kaba bniah bad ka jingpanmap tang na ka bynta jong ngi ka thaiñ Sohra, ban wanrah biang ka jingshaniah jong ki paidbah jong ngi ka thaiñ.”
