Shillong, Jylliew 10
U Bah Sambor Surong uba dei u nongseng jong ka West Jaiñtia Hills District Adventure Sports and Mountaineering Club kaba dei kawei na ki kynhun kaba la ïarap ban wad lang ïa u Raja Raghuvanshi bad ka Sonam Raghuvanshi, u la pynpaw ka jingsngewkmen hadien ba ki pulit ki la lap ïa ka Sonam ba ka dang im.
U la ong ba u sngew kumba ïoh Result Matrik na ka jingwan ‘phone’ ki paralok ban ai ka jingïaroh halor ka jinglenlade jong ka synjuk bad tur ïa ki riat ki ram ha ka por ba ki leit ban wad ïa ka Sonam bad ïa u Raja Raghuvanshi ha Arliang Riat Wei Sawdong.
U la ong wat la ki pulit ki la lap ïa ka Sonam ba ka dang im, pynban u kyrmen pat ba ki pulit kin tohkit bniah ïa ka Sonam ban lap ïa ki jingshisha.
Ha ka jingïaid lynti ka synjuk ban leit wad ïa ka Sonam ki don bun ki jingeh namar ba ki hap ban hiar ïa ki riat kiba jrong bad rung sha ki krem tang ban lap ïa ka Sonam Raghuvanshi, hynrei mynta pat ka synjuk ka pynpaw ka jingsngewtynnad namar ba la lap ïa ka Sonam ba ka dang im.
Ka jingthmu jong ka synjuk ban leit wad ïa ka Sonam hadien ba la lap ïa u Raja na Arliang Riat Wei Sawdong ka long ban lap sa ïa ka Sonam hynrei hapdeng ka jingleit wad shitom kim shem la lap dien eiei bad mynta pat la lap ba ka Sonam ka dang im.
Hadien ka jingshah kynthoh ïa ka Jylla ha kiba bun rukom, na ka liang ka synjuk hi ka pyrshah jur khamtam eh ka jingkynnoh jong u kpa ka Sonam ba dei ba donkti ki briew ka Jylla Meghalaya bad ka Sorkar Meghalaya ka ïashah, hynrei mynta ka la paw shai ba ka Ri Khasi jong ngi ka dei kaba tipbriew tipblei, ong u Bah Sambor.
Ha kajuh ka por u Bah Sambor u la ai ka jingkhublei kaba kyrpang ïa u SDPO ka Sohra uba la ai jaka sah jaka dem bad ban pynbiang ka bam ka dih ïa ki bad ruh ïa ki pulit ka SDRF, NDRF kiba la hiar lang shapoh riat ban wad ïa ka Sonam.
