Washington, Jylliew:
U President jong ka US, Donald Trump, ha ka Lah Sngi U Blei u la ong ba kan long “kaba khraw” lada u Lat jong ka California, Gavin Newsom, un shah kem haba iadei bad ka jingkynnoh ba kitei ki ar ngut ki don hapdeng ka jing-iakynad halor ki jing-iakhih ha Los Angeles.
U Trump, 78 snem ka rta, u la buh ïa ki National Guard ha ka nongbah kaba ar jong ka America ha ka Sngi Saitjaiñ hadien ba la mih ki jingïakynad halor ka jingkhynra ïa ki nongwan buhai shnong sha US hynrei um shym la pan jingmynjur satia na u Lat jong ka Democratic, kaba dei ka sien kaba nyngkong ba u President jong ka US, un shim hi da lade shimet ïa kum kane ka sienjam ha ki 60 snem ba ka US ka la ioh ia shibun ngut ki nongsynshar lane President.
Katba ki kynrum-kynram ki dang shit rhem, u Newsom, 57 snem ka rta, u la byrngem ban kem ïa u Tom Homan, uba dei u heh na kitei ki thaiñ khappud ba la thung da u Trump hadien ba u Homan, u la ong ba u Lat bad ka Mayor jong ka LA, ka Karen Bass, ki lah ban shah kynnoh ha ka sorkar pdeng halor ka jingpyrshang ban khanglad ïa ki nongtrei kiba peit ïa ka kam khappud.
U Trump, u ong ba U Newsom, uba la shah kynthoh jur ha kine ki sngi, u dei uba lah ban long u kyrtong President ha u snem 2028, bad u la “leh ïa ka kam kaba kongsan” ba u la lah ban tehlakam ïa ki jingïakynad ha Los Angeles.
Hadien kata u Trump u la ong ba “Ngam kwah ia ka thma pohïing”, hynrei ba “ka thma pohïing kan sa jia lada phi iehnoh ïa ka ha ki briew ba kum ma u.”
U Newsom u la kynthoh jur ïa u Trump ba u long u nong wanrah jingeh tang ban ïoh jingmyntoi ha ka saiñ hima-sima, da kaba ong ba ki bor aiñ jong ka thaiñ ki lah ban khanglad ïa ki jingïakhih khlem ki shipai ka tnat National Guard.
Nangta utei u nongialam ha ka Sngi Nyngkong, u la khot ïa u Trump da ‘u nongsynshar donbor’ hadien ba ka sorkar jong u Trump ka la phah ïa ki 700 ngut ki shipai duriaw ba kin leit sha Los Angeles ban pahara bad tehlakam ia kino- kino ki jingiakhih kiba mih ha katei ka nongbah.
