Shillong, Jylliew 10
U Myntri Rangbah ka Jylla, Conrad K Sangma, u la kular ban phah pynsted ïa ka jingtian bishar ïa ka mukotduma pyrshah ïa ka Sonam Raghuvanshi kaba phah pynïap ïa la u kurim u Raja Raghuvanshi ha Sohra lem bad saw ngut ki runar ba leh ïa kane ka kam bymman.
“Hooid, ngi kwah ban pyndep kham kloi kat kaba lah ïa ka jingtian bishar bad kano-kano ka sienjam kaba donkam ban shim na ka liang jong ngi kum ka Sorkar, ngin sa leh ïa kata bad ngin pyrshang ban pynïaid wut wut ïa ka mukotduma,” ong u Conrad.
Haba shim ba ka jingpynmih khubor bakla jong ki national media kum ka kam kaba sngewsih jur, u Myntri Rangbah u la ong, “Ka long kaba sngewsih shibun ba katto-katne ki lad pathai khubor ki la pynkylla khongpong ïa kaei kaba jia bad pyrshang ban kynnoh ïa ki nongshong shnong ka Meghalaya bad ïa ka Jylla. Hynrei mynta ki jingshisha ki la paw lut. Ngi tip kumno kane ka jingjia ka la jia”.
Shuh shuh u Conrad u la ong, “Nga la ju pynskhem ba ki nongshong shnong ka Meghalaya bad ki nongshong shnong ka thaiñ shatei lam-mihngi ki dei ki briew kiba long paralok ïa baroh, kiba ju kheiñ ïa ki nongwankai bad ki nongshangkai kum ki bahaïing bahasem. Ki ju burom bad kitkhia bha ïa ki kumta ka long kaba sngewsih ba katto-katne ki lad pathai khubor ki pyrshang ban pyni ïa kane ha ka lynti ka bym dei. Mynta ki jingshisha baroh kila mih, kiei kiei baroh kila shai kdar lut.”
U Conrad u la ai khublei ïa ki pulit ka Meghalaya halor ka jinglah ka jong ki ban sei ïa ki jingshisha hapoh ka por ba lyngkot eh.
