Shillong, Jylliew 10
U hynmen jong u Raja Raghuvanshi, u Vipin Raghuvanshi ha ka Sngi Ba-ar u la panmap na ka Sorkar Meghalaya halor ki jingkren jong u lyngba ki lad pathai khubor naduh ba u para jong u, u la jah rngai ha thaiñ Sohra.
Haba kren sha ki lad pathai khubor ha Madhya Pradesh, u Vipin u la ong ba u shim ïa ka lad ban panmap na ka Sorkar Meghalaya. U la ong ba ha ka por ba ki dang ïa wad ïa u Raja bad ka Sonam, u la kum kren bun kiei-kiei pyrshah ïa ka Sorkar bad ruh ïa ki pulit ka Meghalaya hynrei u khlem tip pat ba ka jingtohkit ka la ïaid bha ban lap ïa ki jingshisha halor katei ka jingjia ïa u Raja.
Kum ban shu pynkynmaw ba ha ka por ba dang ïaid ka jingwad ïa ki shikurim ha ka por ba ki dang jah rngai bad ha ka por ba la lap ïa ka metïap u Raja, u Vipin u la kynthoh bad ong ba ka Sorkar Meghalaya bad ruh ki pulit kim shym la shimkhia bad kynnoh ruh ba ka dei ba la leh da ki briew na kane ka jaka bad ba ka Sorkar ruh ka kwah ban buhrieh.
Lah ban kdew ba ki la bun ki jingdawa ban leh da kaba tyngeh pyrshah ïa kito kiba la kynthoh khlem nongrim pyrshah ïa ka Jylla bad ki nongshong shnong.
