Shillong, Jylliew 10
Ha kawei ka jingjia kaba sngewsih, uwei u khynnah uba ju leit ban plie um mynstep ha ka por kumba 8 haduh 8:30 eiei, u la lap ïa uwei u briew uba la sdien phasi ïalade ha ka 10 tarik u bnai Jylliew, 2025 ha ka shnong Umphyrnai, Lad Smit.
Na ka liang utei u khynnah lem bad u paralok jong u, ki la pyntip noh halor kane ka jingjia sha ki bor shnong kiba la leit ban peit dalade bad ban pyntip noh mar-mar sha ki por pulit halor kane ka jingjia.
Haba ïoh ban ïakren bad u Sordar Shnong, Bah Lovingstonewell Kharkongor, u la ong ba ha katei ka jingleit ban peit ïa utei u khynnah uba sdien phasi ïalade, la lap ba ka don ka mobile phone ha ryngkat ka jingpyndait ïa u jingsngap jingrwai ne ‘earphone’ ha ki shkor jong u, ar tylli ki bilor kyiad ha kaba kawei ka la don sa tang shiteng bad kawei pat ka bym pat plie bad u shana hajan jong utei u khynnah.
Na ka liang ki bor pulit ynda ki la ‘charge’ ïa ka phone jong u bad hadien katto-katne por eiei, ka la wan ka ‘phone call’ na kawei ka briew kaba die sha ha Lad Smit kaba la ong ba ka trai bylla jong utei u samla ka la pyrshang ban phone ïa utei u samla hynrei kam ïoh, kumta ka la pyrshang phone noh sa ma ka ïa utei u samla hadien ba ka la ïoh nombar jong u na ki paralok kiba ïatreilang bad u.
U Sordar Shnong u la ïathuh ba utei u khynnah u dei uba trei bylla ha Lad Smit bad la shu antad ba u don hapdeng ka kyrta kaba 25 snem eiei bad u dei shnong trai na Ïongkaluh kaba hap hapoh ka Jaiñtia Hills District.
U Sordar Shnong u la ïathuh ba lehse katei ka jingsdien phasi jong utei u samla ka la jia ha ka por mynmiet jong ka 9 tarik u bnai Jylliew, 2025 bad la lap pat ha ka sngi kaba bud.
U la ïathuh ba ha ka 9 tarik u bnai Jylliew, utei u samla u dang leit trei bylla lem bad la ki paralok. U dei ruh uba sah ha ka jaka bylla jong u hynrei ha ka por mynmiet pat u la shu jah kumto na ka jaka trei.
U Sordar Shnong u la ïathuh ba ka daw halor ka jingpynkut noh jong utei u samla ïa la ka jingim ym tip satia bad na ka liang ki paralok kiba ïatreilang ruh ki la ïathuh ba kim don daw eiei ruh.
Shuh-shuh, utei u Sordar Shnong u la ïathuh ba um tip la utei u samla u dei uba dang shu trei bylla shen ne uba la trei la kham slem ha Lad Smit bad u dei uba bylla kit jingkit bad shna jingshna.
U Sordar Shnong u la ïathuh ba ïa ka met jong utei u samla la pynkit noh sha Civil Hospital Shillong.
