Nongstoiñ, Jylliew 10
Ki nongshong shnong jong ka Kyrshai bad ki shnong markhap kiba kynthup naduh ki shnong Khasi bad Garo na Meghalaya bad ruh ki shnong Rabha na Assam, ha ka 9 tarik mynta u bnai ki la pynlong ïa ka jingïalang paidbah ha Segunbari, Ukïam kaba don ha khappud bad ka West Khasi Hills ban pyrshah ïa ka jingthmu ban tei bad shna ïa ka Kulsi dam na ka bynta ban pynmih ïa ka Hydro Electrical Project.
Ha kane ka sngi la ïashim bynta da ki spah ngut tam ki briew, naduh ki nongmihkhmat na ka Khasi Students Union, Garo Students Union, ka Garo National Council, Garo Women Council, Garo Youth Council, Garo Student Union Assam Zone, Rabha Women Council, Sixth Schedule Demand Committee, bad ka Rabha Student Union, bad kiwei kiwei.
U Johar Marak kum Chairman ka Joint Action Committee, u la pynpaw ka jingpyrshah ïa ka jingthmu shna Hydro Power Project ha Wah Kri bad pyntip ba la bun bun snem ki la pyrshah ïa kane ka jingthmu namar ka ktah ïa 10 tylli eiei ki shnong.
Shuh shuh, u la ong ruh ba wat hapdeng ka jingïalang kaba dang shen ha kaba ar ngut ki Myntri Rangbah ka Meghalaya bad Assam ha ka 2 tarik u Jylliew, 2025, ki la rai ban bteng ïa ka projek, ka la mih ka jingtieng ha ka jingmut jingpyrkhat jong ki nongshong shnong na baroh ar tylli ki jylla ha West Khasi Hills district da kaba pynpaw ïa ka jingsngewkhia ba ka projek pynmih bording kan ktah jur ïa ka um bad ka jingma ha ka por tlang.
U la pynpaw ruh ba kane ka jaka ba la thmu ban shna dam ka kynthup ha kylleng ka Ri Bhoi District ha ka liang kadiang jong ka wah Kri bad ka Assam Forest Range ha ka liang kadiang.
U la pynpaw ruh ba ki shnong kiba heh kiba lah ban shah ktah na ka jingshlei um ha kane ka jylla Meghalaya ki long ka Kyrshai, Nongspung bad Rambrai, katba ha Assam, ki shnong kiba la shah ktah ki kynthup ïa ka Noonmati, Gohaipara, Borkar, Warigro Rabhaparapara, Matchokjakol, Krishnaipara, Mawsamaidakhemurol, Borkar. Nalorkata, ki shnong kum ka Ukium, Songgital, Umthli, Dalimara, Mekamdol, Gambalchiring, Doledonga, Borkhuli, bad Uryngdem ruh kin shah ktah.
