Shillong, Jylliew 10
Hadien ka jingphet rieh kaba la bun sngi, ka Sonam Raghuvanshi ka la wan poi ha nongbah Shillong ha ka por shiteng synñia hadien ba ki pulit ka nongbah ki la wan ïalam ïa ka na Ghazipur, Uttar Pradesh.
Ka Sonam ka dei kaba la shah kynnoh ba ka la donkti ban pynïap ïa la u kurim, u Raja Raghuvanshi ha ka thaiñ Sohra. Nalor jong ka Sonam, ki don sa 4 ngut kiwei pat kiba la shah kem na ka Jylla Madhya Pradesh bad kine ruh ki dang don ha lynti ban wan sha Shillong.
Ka liengsuiñ kaba kit ïa ka Sonam na Patna, Bihar sha Guwahati ka la wan poi hynnin ka miet bad na Guwahati la wan ïalam noh ïa ka sha Shillong.
Ïa ka Sonam yn sa leit rah sha ïingbishar ha ka por mynstep khnang ba ki pulit kin ïoh jingbit ban tohkit ïa ka.
Ki pulit ka Jylla mynta ka shiteng miet ki la pynlong ka jingap pahara bha ha khyrdop ka thanad Sadar ban ap ïa ka Sonam.
Ka Sonam ka la poi ha ka por kumba 12:40 baje eiei ha thanad Sadar hapdeng ka jingpahara kaba jur jong ki pulit.
