Shillong, Jylliew 10
Ka President ka Meghalaya Pradesh Mahila Congress (MPCC) Kong Joplyn S Shylla, ka la pynpaw ïa ka jingsngewkhia kaba khraw halor ka jingkiew sted bad ka jingngat ki samla ha ki kam sniew ha kylleng ka ri ha kine ki sngi kiba mynta.
Ka Kong Joplyn ka la ong ba ki samla ki dei u budlum jong ka lawei jong ka Ri bad ka jaidbynriew hynrei ka jingkiew jong ka jingdon bynta ki samla ha ki kam thombor bad kam beaiñ ka dei ka jingeh kaba khraw.
“Kane ka pyni shai kdar ïa ki jingeh ba ki khun samla jong ngi ki shem bad kam don shuh ka lad da kumwei hynrei ban shu ngat ha ki kam sniew, ka ktah shibun ha ka imlang sahlang, kum ka jingbym don kamai, ka jingbym don jingai jinghikai na la ïing, ka jingdih ïa u drok bad ka jingshah ktah ha ki rynsan ‘social media’,” ong ka Kong Joplyn.
Ka Kong Joplyn ka la kyntu ïa ka Sorkar Pdeng bad Sorkar Jylla ba kin shimkhia ban tehlakam ïa kane ka jingeh lyngba ka pule puthi babiang bad kaba skhem, ban pynlong ïa ki prokram ai mynsiem ïa ki samla da kaba ïarap ban ai ïa ki kam ki jam, bad ban pyntreikam da ki aiñ kiba tyngeh ki ban tehlakam ïa ki kam sniew.
Ka Kong Joplyn ka kyntu ruh ïa ki longïing, ki nonghikai, bad ki paidbah ba kin ïashim bynta ban ïarap bad ïasyllok ïa ki samla ban ïaid ha ka lynti kaba dei.
